اشرفت واهرمت
الزين غاب
والشعر شاب
الفم راب وتفرقوا لصحاب
الجلد اتقروش
والظهر التقوس
والليت غير امكمش
وعقلي امشوش
انظر اقلال
والسمع تقال
والليت محبوس في زاوية
ركابية مطوية
والكلام ممنوع عليا
وإلى جاوا الضيفان ولحباب
عليا يتسد الباب
وأنا اللي كنت يتعمل لي ألف احساب
الكل عليا ساب
لما صحتي جهدها ذاب
والليت في داري غريب
وكلامي كلو عيب
انشوف بعينيا
لكن ما سامع ما فاهم
آش كينوعروا عليا
يتغامزوا قدام عينيا
ويكثروا في الضحك
ويكولوا هذا ما فاهام ما سامع
راه غير اصمك
الزمام فلت لي من بين إيديا
كل شي اتمنعت منو هو ليا
صبحوا يتشاوروا عليا
أو شوف تشوف
إيحنوا أو ما يحنوا فيا.