الغمة
لوراق ضمصات
وتجمعات النوضة
الثورة تنفضات
وعمت الفوضى
لكلام تململ
قاصد باب الهضرة
بلا ميعاد بلا حضر
تخطى العتبة وصاب
شلا تم
تم، تمتم...
فين الحق، فين ناسو؟
مال بنادم عمى ونسى ساسه
مال الباطل حبيب عندكم
مال يام طال
فين الحق؟
وفين اللي كان سباب هجران؟
ايه...
لا اله الا الله
التفتيفة طيحت لجام
الديب رعب لغنام
طاحت الصمعة
تعلق الحجام
سد المعمل
تعتقل الخدام
وفين هو المناضل..؟
تملك لكلاكاج في بحور ظلام
بردت عليه لعظام
خانو الدراع
ثقال عليه اللسان
تلف حار
ما جبر ما يعم
تلف سوارت لقفل
لكلام على طرف اللسان
خبز تحت باطي
ما سمع حد عياطي
عيط، عكعك، حيح، غوت
كالت:...
خلوني نغوت باش نتقوت