دامي وملوك العشق
راني خايف آمي
وخايف أكثر
إيلا تكون دامي والفت الغدر
وتولي الدمعة
في عيني
ظافرة سوالف
وكابة فـ بحر
-2-
راني خايف آمي
وخايف أكثر
إيلا ينوض المعنى
على الگراك
وذاتي تنفر
تنفر هاذ الحروف
حروفي بيضة
وقلبي محبيضة
وايلا فقصو الحروف تمة
غادي يفقصوني أكثر
-3-
راني خايف أمي
وخايف أكثر
إيلا مطمورة القلب تعمر
وتفيض الحروف الحايلة من الصغر
ويلا كتب الله وفاضت
نكون أنا حجاية
ومشات مع الواد
وأنت يا دامي
تقليد في عنقك
هاذ المداد
-4-
يا دامي
شهدي راني آدامي
بلا خاطر نلبس الحمر
أنت زاهية ف احلامي
نشوفك ورايا
نشوفك قدامي
خيالك جمر
أنت صلصال
عاجباك وشامي
مسحي لوحة القلب
نقراها فـ الفجر
أنت سحور
فـ عتبة كلامي
مدفون في روضة منسية
وأنا ميت فـ قبر
أنت خبر
جايباه حمامة غرية
فيقتني على قولة: الله أكبر.
-5-
الله على حلمة
لا..لا..لا..
ماشي حلمة
هاذي دامي
راها دامي
شفتو دامي
يا دامي
سوليني في السر
سوليني في الجهر
واش أنا براح ولا رامي؟
أنا بجوج يا لالى
وأنت قولي الله يستر
أنا براح
عليك ننادي كل صباح
فـ حضرتك عودي عثر
وأنا رامي
عييت نيش بسهامي
نبلتي من بهاك تكسر
حوزي فرگ محبتك
يدوز على جناني
يدير حب الحب لگط
وأنا ما يكفيني صبر
يا دامي
إيلا غلبني ظلامي
نسال فيك
تفيقي الفجر
يمكن شمسه
تحيد تغزاز عظامي
يمكن
خاطري يتبشر.
-6-
يا دامي
فكي طلاسمي المعلقة فـ الشجر
ريح تديها
وريح تجيبها
وگلبي معاها
ما هو فـ وقر