(14)
ويش هالعريس الطايف ابن الدلال والعادة
قاعد على المخدة وإجرو على السجادة
يا بيّو قوم وافتحلوا جايب معه القلادة
(العادة= الغيّة، السجادة= الخديدية).
ويش هالعريس اللي تقولوا عنو
يا خلقة الرحمن قالوا عنو
والله لالحقه على حمامه
أضحك عليه وآخذ بدلته منو
(حمامه= منامه)
يا بيّ العريس يا لبيب السيف
الله يجيرك يا محيي الضيف
(لبيب السيف= وردة جورية أو وردة بمزرعة أو لبيب الخاتم، يا محيي الضيف= يا صاحب االناموس والكبرية أو للضيف دوم مشرعة أو يا محيي الحاكم)
عند الوصول إلى البيت لينزل العريس عن الفرس:
يا هاالعريس الْ راكب بدك تنزل
خيل الأعادي قاصدة للمنزل
يا طالعة من عقبات الريحاني
وقفوا للعريس مهرته تعبانِة
وقفوا ل بيّو تا يمد سفرتُه
يا سفرتُه ما مدها سلطانِ
المقطع السابق عند نزول العريس عن الفرس وقبيل غداء الناس، والآن إلى غداء الناس:
يا مين يغدّي هالصبايا علب
بصحون فضة والمعالق ذهب
يا مين يغذي هالصبايا إوز
بصحون فضة والمعالق ألماز
وعند الوصول إلى بيت أهل العروس لأخذها:
يا بيّ العروس كثر الترحيبِة
إحنا ضيوفك من بلاد بعيدة
إحنا الأمارة دوبنا لفينا
من باب مكة للحرم صلينا
ولحظة الخروج مع العروس من بيت أهلها:
يخلف عليكو وكثر الله خيركو
ولا عجبنا بالنسايب غيركو
..
صارت لُنا ام الحسن صارت لِنا
صار الحمام يدرج على ابوابنا
يا ذكرة الله يا خزاك يا إبليس
يا مين يروح يبشر العريس
خد العروس احمر بلا تنقيش
وعين العروس كحلا بلا مروادِة
(إبليس= الشيطان، العريس= العرسان)
هنية يا عريس الزين هنية
هنية بالرواحة والمجيّة
هنية للعريس تيجيب عروسته
ويعيّب ع شباب العزابية