(16)
الأغاني التالية يتم بعضها في منزل أهل العروس أحياناً، وهذه الأغنية على وزن (ردات يويا):
مسيكو بالخير** يا أهل البيت
من هو ضايفكو** يا أهل البيت
العريس ضايفكو** يا أهل البيت
بدو بنيّتكو** يا أهل البيت
بدو..
يخلف على خال العروس
راعي الشرف راعي الناموس
عروستنا ملا عروس
عروستنا يا ام الحلق
قبّضنا فيدها روق
عروستنا يا ام الكردان
قبضنا فيدها ذهبان
ويمسكون بالدبكة عند أهل العروس:
حولونا حولونا ** نسايب لا تزعلونا
عادتنا نلبس مقاصب ** عادتنا نشلح مقاصب
عادتنا نناسب مناصب ** بالكرم ما يغلبونا
عادتنا نلبس مخامل ** عادتنا نشلح مخامل
عادتنا نناسب حمايل ** بالكرم ما يغلبونا
دار أبو العروس ويا ركّة على ركّة
يللي حرثتي على قلوب العدا بسكّة
هجمت عليكي الأعادي تا يصيدوكي
فشرت لحاهم ولا غدوا يطولوكي
هذه الأنشودة سيتذكرها من سمع شريط (لا شيء يهم) لليرموك، في الوصلة الشعبية:
قطعنا البحر بحرينِ
قطعنا البحر يا عيني
قطعنا البحر يا عمي
على اللي خصرها ضمِّة
(عمي= خالي، خصرها ضمة= فيدها غالي)
مندل مندل منديلا
عريس يا أبو المنديلا
هاتوا الجمل تا نرحل
عالقدس والخليلا
قاعد بالبيت الغربي
وداير وجهه للغربي
عريس حرقت قلبي
بلبسانك للمنديلا
شمع العريس سلطاني
وأنا اشعلُه بداري
وانده وأقول يا بيّو
هَيّي العروس للغالي
(بيّو= إمه)
هذه الأنشودة من أكثر الأغاني التي اعجبتني، يمكن لأن اهل بلدنا كانوا يزرعون السمسم بكثرة..
والسمسم الأخضر جلل الحيطان
من هو عريس وميمتُه فرحانِة
فلان العريس وميمتُه فرحانِة
قولوا للتاجر يفتح الدكانِة
يطول القمصان يلبس العرسانِ
(التاجر= الصايغ أو، القمصان/البدلات= الساعات/المحابس)
يا حميمصة يا فريط رماني
يا حميمصة حامضُه لفّاني
يا حميمصة صريت لُه الريحة
يا حميمصة بمحرمة مليحة
(الريحة= القهوة، مليحة= شهوة).
واللي فرح لِنا ييجي ويهنينا
واللي فرح لِنا ييجي من باب الدار
ولاّ أنت يا عريس يا مزرر القفطان
(الدار= الخوخة، القفطان= الجوخة)
يا فرحتي اللي ما طال العمر برقب ليها
وسْألت رب السما إنه يتمِّمِها
واتّممت يا عزيز الروح يا غالي
واتّممت بعناية ربنا العالي
قومي اركبي غزالِة قومي تمامك عاد
شعرك ربايط سعد رابي عا جنب الوادْ
(عاد= بس أو بيضة يا رفيعة، الواد= البص أو رابي عالشريعة)
بالإضافة إلى هذا، لم نذكر المهاهاة والأغاني المكررة والمناظرات بين الحدائين في الأعراس، وبعض الأغاني التي ذكرت سابقاً..