[فاطمة العقاد]

يا سفينة الاحلام
حالنا شكون بحالو؟
ركبنا بحر الزمان
غلباتنا هوالو
واحد زاده هم ثقيل
ولاخر ماهاز والو
مشينا والليل طويل
غبر بياضنا فكحالو
والشمس باهتة والضو قليل
وقلب الحر الظلام ما يحلالو
يا سفينة الاحلام
حالنا شكون بحالو؟
والورد شكل ينسيك شكيل
لكن الريحا ماهياش ديالو
والنجمة بعيدة وضوها جميل
تعيا دور ماتلقاش بحالو
ولي طغى وتجبر شوفو قليل
واخا يطوال مايقطف والو
يا سفينة الاحلام
حالنا شكون بحالو؟
هذا مسكين فالهم عليل
ولاخر عاجبو غير خيالو
ما رقعنا السفينة مالقينا بديل
والهم كبر وطوالو جلالو
مارقعنا السفينة ما نفعنا رحيل
والحلم كبر ما قدينا على هبالو
البحر هاج دمنا باقي يسيل
بلعنا الحوت وتهنا فوصالو
ياسفينة الاحلام
حالنا شكون بحالو؟
راس مالك حكمة واخا جهد قليل
سعدات لي زيانت فعالو
والصبر عطية من عند الجليل
لي ذاق مرارو يصفالو حالو
يا سفينة الاحلام
حالنا شكون بحالو؟
05/06/2014