[المصطفى حرموش]

[read]حتى لين..
يد السعاية ترقص،
بين خيوط بياض المنجج،
طالبة راغبة،
عطف الجواد..؟

حتى لين..
الشمتة تعزيني،
ف شهادة ''بابا عيشور''،
اللي ف عز الخُلوة..
داه الواد..؟

حتى لين..
لخصاص مسميني،
دينار ف جبيني،
عشيري ولد البلاد..؟

حتى لين..
الخوف مدفيني،
ركن وجوب ف "ديني"،
لابسني قشابة،
سيني..
مكملها بالعقاد..؟؟

حتى لين..
جنبي مسكون،
ف قديدة مرهون،
مسلح ب مجامر ولدون،
عينُ عل الولاد..؟

حتى لين..
همي جار ذيلُ،
مقلز ف قليلً،
شادْ حق الله ف جْلَيْلُ،
مداوي الصبر بالرماد..؟؟[/read]