[المصطفى حرموش]

غير زيد عاود
علكة معجون بالقطران
ديما تايق في المزاود
ما انت ساحي..ما انت سكران
شحال يا صاح قدك تعاند

مخاصم الحق
مزكرم البيبان
الظلم خاطف الشوفة
يضحك من شق النوافذ

نصحناك زمان
قلت:هدا ما كان
شارب الهم..سخون و بارد
حيرتينا..
بكتينا...
معاك تاهو قومان
مقراجك عل الجمر زاند

دابا اللي فيه الحال بان
تعلق وشيطو ليك الرواند
ظنتيها طايبة ف الجنان
سرح فيها الدود والقنافد

حجبتي موكة ف الغيران
الحلوف ف الغابة لابد
الخيوط الراشية..
ما تجيبك نيشان.
عيفة الصيدة الما الراكد

جدد الوضو يا فلان
غدا صلاتك تكون عليك شاهد...........