[حسن الحاجبي]

احكم احكم يا القاضي
راعي مولاك فلحكام
من غير الله لا تراضي
وعمل بحساب ليام
لو كان تدوم يا القاضي
دامت لشلا قوام
ملكو لقصور والرياضي
ظنو يخلدو على الدوام
سيدي القاضي آش هدا
عطاك الله السيادة
وعلام العز والريادة
وكرسي لحكام والقيادة
علا شانك دارلو مقام
مالك طامع فالزيادة
علاش تخالف الشهادة
تمشي في طريق لحرام
خسارة يا القاضي خسارة
دخلتي لسواق الشطارة
غروك صحاب الشكارة
عليتي على الناس لعوام
ماعندك غير هاك وارا
تشد الرشوة بلجهارة
تطلق سراح الشفارة
وتاكل من مال ليتام
ميزانك مال يا القاضي
حسبي الله في قضاك
ماقلتي ذ الجلال حاضي
مادرتي خوفو وراك
كيف تريدو يكون راضي
وانت غايس في خطاك
لاقاضي إلا القاضي
في يوم الهول العظيم
يتنشر الكتاب ناضي
وتتسعر نار الجحيم
يسعد من للشرع حاضي
ويشقى الظالم اللئيم
تما نرجاك يا القاضي
توجدني عندو خصيم