[ليلى مرجان]

جَرّوني لَحْكامْ

وَقْفوني

جاتْ عيني

فْعَيْن لْقاضي

قْرَيتْ لو بلْسانها

لََبْكَم رسالة

فيها معنى

سَرَدْتْ لو هْتوفْ

تْحَبْكاتْ بمناوَلْ

عَوْجة

وُ نَجَّاتْ1 بْطَعْمة

بالية

توب ما وَتاني

خَلْخَلْ قْياس الميزانْ

و الميزان مَعْدَنْ تْقيلْ

يُومْ الميعادْ

تَتْفَرَّقْ لَحْقوق

حَقَّقْ وُ تْدَبَّرْ

يا لْقاضي

بْقْواعَدْ الحقْ

مَنْطَقْ حْكامَكْ

وُ ديرْ يومْ لَحسابْ

قُدَّامَكْ

سَجَّلْ فْكْتابَكْ

ما تْريدْ

وابْني احْكامَكْ

مَضِّي موسَكْ

عْلى ضَهْري

غامَرْ ولْمُغامَرة لْغامْ

فْكُلْ جْنانْ تُرْبَة

هْشيشَة تَخْوي بيكْ

يُومْ لْعَرْضْ

خَلِّيتْ مَرْكْبي

فْرْصيفْ لْقاضي

حَمْلو عْليهْ تجارْ لْبُهْتانْ

سَلْعة ارْخيصة مْنيعَة

عْلى بْياضْ وَجْهي

تاجْرو فْبَراءْتي

بْعُمْلة مَغْشوشة

غْشَّاوْ لْحَقيقة

بْسْوادْ سْلاحهُمْ

دَبْحوني بْحْديدَة

مْصَدْيَة2

سَكْـنوني فْحُفْرة

ڭاَسْـيَة3

شَرْبَاتْ بْرودَتْها

حَرارَة دَمِّي

نَشْفَّاتْ جَلْدي

وُ رَشّاتْ عْضامي

مَنْ سوقْ الضْلامْ

تْسَّـوْقو قُفة شوكْ

مَزْقات لحمي

تْوَسْعاتْ الدَّبْحة

قَطْعاتْ صَبْري

تْفَجَّرْ غَضَبي

وُ مَنْ نَفْسْ لْسانْ عَيْني

لَخْرَسْ

فَرَّغْتْ سْلاحي

بْغَمْزة ساخْرَة

هَرْساتْ كْتافُو

شْتَّاتْ انْتِباهُو

بَلْبْلاتْ حْديتو

وُ نَبْهاتْ غَفْلْتو

مَلِّي4 ارْسَمْتْ لو

فْلَهْوا

بْمْدادْ صَبْعي الجَّافْ

ميزانْ لْحَقْ

وُ ارْفَعْتْ راسي

لَسْما

افْهَمْ اشارْتي الميمية

احْنَى راسو

عْلى وَرْقَةْ لَحْكامْ

وانْطَقْ بْلْسان لْفُصْحى

إلى جلسة أخرى

ترفع القضية

شرح الكلمات

1- نَجَّاتْ: نسجت

2- مْصَدْيَة: صدئة

3- ڭاَسْـيَة: شديدة البرودة

4- ملِّي: لما