يسبق كلامنا سلامنا
يطوف عالسامعين معنا
عصفور محندق يزقزق
كلام موزون له معنى
عن أرض سمرة وقمرة
وضفة ونهر ومراكب
ورفاق مسيرة عسيرة
وصورة حشد ومواكب
في عيون صبية بهية
عليها الكلمة والمعنى
مصر يمّى يا بهية
يا ام طرحة وجلابية
الزمن شاب وانت شابّة
هو رايح وانت جاية
جاية فوق الصعب ماشية
فات عليك ليل ومية
واحتمالك هو هو
وابتسامتك هي هي
تضحكي للصبح يصبح
بعد ليل ومغربية
تطلع الشمس تلاقيكِ
معجبانية وصبية
يا بهـــيـــــــــــة
الليل جزاير جزاير
يمد البحر يفنيها
والفجر شعلة حتعلى
وعمر الموج ما يطويها
والشط باين مداين
عليها الشمس طوافة
ايدك في ايدنا ساعدنا
ده مهما الموجة تتعافى
بالعزم ساعة جماعة
وبالإصرار نخطيها
مصر يامى يا سفينة
مهما كان البحر عاتي
فلاحينك ملاحينك
يزعقوا للريح يواتي
اللي عالدفّة صنايعي
واللي عالمكداف زناتي
واللي فوق الصاري شايف
كل ماضي وكل آتِ
عقدتين والثالثة ثابتة
اركبي الموجة العفية
توصلي بر السلامة
معجبانية وصبية
ويعود كلامنا بسلامنا
يطوف عالصحبة حلواني
عصفور محنّي يغني
على الأفراح ومن تاني
يرمي الغناوي تقاوي
تبوس الأرض تتحنى
تفرح وتطرح وتسرح
وترجع تاني تتغنى
اللي بنى مصر
كان في الأصل حلواني
مصر يمّى يا بهية
يا ام طرحة وجلابية
الزمن شاب وانت شابّة
هو رايح وانت جاية
جاية فوق الصعب ماشية
فات عليك ليل ومية
واحتمالك هو هو
وابتسامتك هي هي
تضحكي للصبح يصبح
بعد ليل ومغربية
تطلع الشمس تلاقيكِ
معجبانية وصبية
يا بهـــيـــــــــــة