[هدى نورالدين الخطيب]

9-

وْجَعْ بْلادي

الزاجل والنبطي

تْفَتَّقْ غْمام صَدْري هاجْ الهَمْ
طارْ لْفَرْحْ كْتَرْ التَّخْمامْ1
لْقَلْبْ جْريحْ وُ عَقْلي فيكْ سَرْحانْ
آه يا بْلادي
خَطْفوكْ خَلاَّوْني2 عايَشْ فْ ظْلاَمْ
هْوايا فيكْ سْحابْ مْحَمَّلْ شُوقْ وُ حَنينْ
هْوايا فيك تْفَجَّرْ مَنْ جَفْنْ لْعَيْنْ
هْوايا فيك وَدْيانْ فايْضَة عْلى مْخَدَّةْ لَعْمَرْ
سَلْبوكْ لْعَدْيان وُ رْماوْني فْ غُرْبة تْمَزَّقْ لَوْصالْ
شُوقي ليكْ سْكينْ قَطَّعْ جْوارْحي
كْبَرْتْ وُ كْبَرْ حُلْمي راغْبَة نْشوفَكْ
راغْبَة نْعَمَّرْ3 صَدْري بهْواكْ
راغْبة نْكونْ حْمامَة تْطير فْ سْماكْ
وُ تَنْزَلْ تْبوسْ4 أَرْضَكْ
راغْبَة نْشَمْ تْرابَكْ
آه يا حُلْمي
عْييتْ نَتْخَيْلَكْ
رْسَمْتَكْ فْ عَيْني جَنَّة فُوقْ الأرض
لَوَّنْتَكْ بْلْوانْ قَلْبي بلْوانْ فَرْحي
غَيْرو صورْتَكْ اللِّي وْصَفْها لي جَدّي
عْييتْ نْرَتَّقْ وَجْهَكْ فْ خْيالي
طال سْهادي وُ بلادي اللِّي ما تْساوَى شْكَلْها
فْ عَيْني زادَتْ هَمي
كِيفْ نْعيشْ وُ انْتِ خاطْفَة روحي
كِيفْ نْهْنَى وُ ظَلَّكْ مْظَلَّلْ لَعْدو
كاسيهْ وُ مْدَفيهْ
وأنا فْ لْغُرْبة عَرْيانَة مَنَّكْ
نْقاوَمِ بُعْدي عْليكْ
نْقاوَمْ صورتَكْ اللِّي ما بْغاتْ5
فْ عَيْني تَثْبَتْ
------------------------------
1-التَّخْمامْ: التفكير
2- خَلاَّوْني: تركوني
3- نْعَمَّرْ: أملأ
4 - تْبوسْ: تقبِّل
5 - ما بْغاتْ: استعصت