أنا هستقل
من تجاربي العامية المصرية لا أعلم إن كانت مناسبة للمنتدى أم غير مفهومة أرجو رأيكم فيها ..
بنت ستاشر سنة قالت في يوم
أنا هستقل
هتم ستاشر سنة
ماسكة الكتاب وعل الهوامش
شخبطة قلوب وأسهم
والورود المزروعين بسأل لمين
جنب الكلام متلخبطة
سيبت الكتاب والأسئلة
وبدون عتاب لحظة فضا
صنع خيالي مشكلة
محتاجة مني ألف حل
يا هل ترى تختاري مين ؟
أخد الوسيم الأسمراني
اللي ف جمالو يضيع زماني
هو دا اللي جوا عيني
م المتاعب هيداريني
ويحبني طول السنين
من غير ملل
ولا يتمرد عليه
ويعجب بحالو شويتين
والبنت دي بتبصلي
والست دي اللي واقعة فيا
وف الجمال
وأنا اللي من غيرتي أموت
وأحط همي في العيال
عل العموم هحطو تحت التجربة
خايفه انها تكون متعبة
مطلعش منها الا بشلل
طب خلاص أخد اللي أدي
بس خايفة انو ما يقدر يوم
يهدي أو يعدي
أو يصحي اللي انتحر
في حلم كان برج الأمل
واللي أكبر منا سنه
معرفش يلمس حاجة فيني
فاكرنا جنة من غير عمل
يا للأسف يا للخجل ..
طب لما كل دا يفاجئني
يملا قلبي
ويحجر الدمعة ف عيني
هعرف أعيشو أويعشني
هستنى ايه لحظة ندم ؟
مكتوبلها تيجي م العدم
تكسر جبيني
ولا كام طفل يجيني ؟
بيهم يبيع ويشتريني !
واتشحطط ف المحاكم
وأسأل عن الحلول ويكون
إيه العمل .
طب واللي اصغر منا سنه
هو دا اللي هيبقى عاقل
هو دا اللي هيحتضني ويحتويني
ولا هينتف رموشي رمشه رمشه
ويعدلي كل الزلل
ويطفي آخر نور في عيني
وادخل بسببو العباسية
محجوزلي قسم المعتوهين
اللي خطر متسجلين
وهناك يطول بيا الأجل
واخرج بنت تسعين ورورة
من السنين اللي قضيتها
في قصتو المزيفة
وعلى جثتي يطمنو
ان عقلي ميه ميه
سليم ومش مخرفة
كل الحكاية حاجات بسيطة
حبة وجع شيخوخة
وشوية علل
وابدأ حياتي من جديد
اوعو بقى ياناس سيبوني
لا تعطلوني في خطوتي
وشوق عيوني
هختار شريك عمري اللي جاي
وادقق كويس في اختياري
أصلو مش فالت عياري
وأشوف عريس قيمة وعدل
لسه الحياة قدامي
صاحية مصحصة
وأنا صحيح مكسحة
لا تفكروني مروحة
إلا على بيت العدل
وإياك تقولو عندي ضغط وسكري
زايد شوية نافص شوية
محتاجة زرع كبد وكليتين
وسناني الباقية ملخلخة
ووداني مش بتشوف وعيني
وضاقت تياجان شرايني
والقلب عندي محتمل
لكن دا عادي مش مهم
خليكو فيا أنا الأهم
في لسه عندي باقي حلم من الذراع
وم الإيدين عقلة تفاؤل
ورمشتين ضحك وفرح
وفي الحياة لسه في شعرة أمل
بتقولو ايه أنا سامعة منكم برطمة
ياست دا انتي ميته من كام سنة
وعريس الغفلة اللي ف خيالك
مات من زمان
كان عاشق لواحدة بنفس الجنان
هي اللي على ايديها اتقتل .
فتحت عيني فوقت ومسكت الكتاب
إيه كل دا دي حياة عذاب..
تشبه هباب الحلة بتاعة جدتي .
يادهيتي هو دا الحلم الجميل والمشكلة
إللي لا ليها م الألف حل ولا حتى حل
خليني في كتابي طموحي ودراستي
مش فارس يكسر فراستي
ولا حتى بحبو يذلني
أنا اللي هتنكسر ليها الحياة
هأمر وهنهي بحكم ربي
وورايا هتمشي في الإتجاه
أنا اللي عاوزاه هيتعمل
وبعلمي وبأخلاقي
أنا هستقل .
نور الأدب (تعليقات الفيسبوك)
|