[مرمريوسف]

من الأسكندرية مدينة الجمال
الحلوة دى قامت صلت فى الفجرية
والصبح شقشق فى سماها شوية شوية
فردت شبكها على المالح زى امبارح
طلع الشبك بالخير طارح فى الضهرية

الحلوة فردت ملايتها فى العصرية
وسط الايدين الشقيانة والشغالة
سمت معاهم واتقاسمو رزق وقسمة
رب النعم سمو بأسمه ورضيو الحالة

الحلوة فردت منديلها هناك ع المينا
شراع يقابل ويودع كل سفينة
رسمت على المنديل رسمة دمعة وبسمة
اصل الفراق دايما قسمة ووعد علينا

الحلوة نزلت فى المغرب تمشى شوية
وتبل رجليها فى حضن المية
والموج يعاكس خطوتها لغاية بيتها
والشمس تغرب وساعتها بتشرق هيا
الليل يطل على عيونها ويرمى تحية
يفرد نسيمه على الساحل يملا الدنيا
يحضن غناوى البحارة يلف الحارة
يشفى النفوس الامارة تبات مرضية

الحلوة مش بحر ومينا وليل بحارة
دى تاريخ وفن وميت مدفع وقت الغارة
ومنارة للعلم ورايا وشوف ويايا
فى المكتبة الف حكاية والف امارة

مرسى وابو قير وقبارى وشاطبى وجابر
وياقوت وبشر وابو الدردار نورهم طاير
يحضن سماها وميتها يبوس رملتها
يملا القلوب بمحبتها بقدرة قادر

ينده كوريم م القلعة يلم جنوده
حالف ما يرحم كل اللى يعدى حدوده
هب النديم من بين الناس صحى الاحساس
قال عمرنا ما نطوى الراس سلو جدوده
درويش يمسى على الصحبة ويمسك عوده
وسلامة يعزف الحانه ويرمى وروده
بيرم يلم الناس حواليه ويحكى حكاويه
وكلامه دايما له معانيه

القلب ابيض لون بحرك وعيونك نور
والروح خفيفة وبترفرف زى العصفور
برد الشتا فى حضنك دافى وصيفك صافى
وخريف سنينك متشافى بربيع مسحور

يا حبيبة قالوا كتير عنك وكتير اتقال
قالوا مارية وصبية ومليون موال
وهبوكى للبحر عروسة
ومهرك بوسة
على شط مصر المحروسة
بتزيده جمال
منقول