هلا بالغوالي كلهم ويسعد لي صباحكم
هلا باستاذي مازن ولعيونك احلى فنجان قهوة
وهلا بالحاجة ناهد وزمان يا ناهد ما قعدنا والتم شملنا
وسلامتك من الانفلونزا وبيروح الشر عن قلبك
هلا باستاذتنا الحبيبة هدى
انا معك استاذة هدى القهوة تاعتنا لا يمكن تكون تركية أو على الأقل القهوة اللي
أنا عم أعملها مستحيل ... كل تركيا ما بتعمل مثلها
انا صرت مشهورة على مستوى البحرين فيها وكلهم بيجوا عشان يشربوا قهوتي
القهوة مزاج وذوق وفن ومو كل الناس بتتقن غليها ولا حتى طقوس شربها
وعلى ذكر الهيل انا قهوتي متبلة بالهيل لدرجة بنتي بتقولي لي ماما بطل لون القهوة يبين !
استاذة هدى بالنسبة للميجانا والعتابى مو عارفة شو اقول لك شوفي يا ستي العزيزة
احنا عائلة فنية يعني ربنا خلقنا هيك زوجي صوته جميل جدا ويغني الميجانا والعتابا
هو هلأ خف شوي بس هو مشهور في البلد وفي الاماكن اللي عاش فيها بها الشيء
وهو بيلف بلاد الدنيا يجمع اشرطة الميجانا والعتابا وبيّه قبله كان هيك
وبناتي من هن اطفال يغنوا الميجانا والعتابا لانه صوتهن حلو مثل بيهن
والدبكة الفلسطينية زوجي وبناتي يعني دائما بيدبكوها انا صدقا الدبكة ما بتقنها
هي مو صعبة علي بس انا ما حاولت لكن زوجي وبناتي عاملين فرقة بالبيت
وباجتماعات الاسرة وبكل الحفلات معروفين دار ابو فداء بالغناء والدبكة
وخليني احكي لك طرفة عملتها بزوجي
زوجي بيسافر لبنان وسوريا وفلسطين بيجمع اشرطة هذه الأغاني وبيحتفظ فيها
عنده كيسين كبار مخبيهم بالسيارة ويوم اجى قال خديهم شوي السيارة تعطلت وحطيهم
بعيد عن الصغار انا كنت مشغولة بالمطبخ اخدتهم وحطتيهم على ظهر فرن غاز من الكبار جدا
لأني ما بستعمله الا نادرا جدا جدا جدا وقلت بخبيهم على مهلي وتاني يوم اجيت من الشغل ركض
اعمل غداء وهو لحمة على ورق الدوالي وكنت مستعجلة قلت خلص بحطها بالفرن الكبير اسرع
ولعت الفرن على اكبر نار ومن غير ما اشوف اللي عليه من لخمتي نسيت !
وقعدت الصينية بالفرن ساعة كاملة وبجية زوجي من شغله فات المطبخ وتطلع على الفرن
ومد ايده على الأكياس وقال لي ميساء شو هادول ؟
هم الأشرطة ولا شريط سلمان كلهم ساحو
ويا حرام شو شفقت عليه يومها قد ما هلك وهو يجمعهم
ورجع يسافر ويجمع ويعطيني ويقول مداعب لا تنسي تحطيهم على ظهر الفرن
ههههههههههههههههههههههههههه
بعجبك انا والا شو مفكرة
عامرة بحسكم