[محمد مومر]

دْوَاخَلْ الزْحَامْ

نْوَاسِي مَنْ يْوَاسِينِي

ونْگِيَّدْ خَطْوَاتْ اللِّيلْ

خَطْوَة.. خَطْوَة

نْخَلِّي ظْلامُو

رَحْبَة.. سُوقْ

الْغَالِي رْخِيصْ

الْبَالِي جْدِيدْ

سْوَاكَنْ تْبَرَّحْ..

تَبْرَاحْ

نَغْزَلْ سَالَفْ لَحْدِيثْ

عْلَى نَغْمَةْ التَّحْنَانْ

نْفُكْ الْبَحَّة

مَنْ جُوفْ صَبَّارْ

گَارْحْ..

قَارِي للّْوَاحْ..

نَتْلَفْ فْادْوَاخَلْ الزّْحَامْ

والتَّخْمَامْ

يْفَاگَدْ تَخْمَامِي بْتْعَاوِيدْ

واللّْغَى كْلامْ

والْهَدْرَة كْلامْ

بْغَيْتْ الْوَگْفَة تَبْرَكْ

ونْصَرَّفْ صَبْرِي

رِيشْ الطّْيُورْ

مَا عَنْدْهَا جْنَاحْ

نْمَسَّدْ مْرَاوَدْ التَّنْهِيدَة

بْكَفْ مْخَاوِي لَحْزَانْ

تُغْرُبْ الشُّوفَة

عْلَى خَدّْ مَعْگَازْ

مَا بْكَى

مَا شْكَى

مَا كَحَّلْ شْفَارْ مَغْبُونَة

طَالَبْ السّْمَاحْ

نَسْرَحْ الْحَالْ

بْعْصَا يْتِيمَة

هْبِيلَة فْالشَدَّة

حْنِينَة فْالدَقَّة

يَجْدَبْ الْحَالْ

فْالشَدَّة حْنِينْ

وفْالدَقَّة هْبِيلْ

صْيَّاحْ.