لا تْصِيحِي
مَا بْغيْتْ نَسْمَعْ غْوَاتَكْ
يَعْگَزْ شْرُوقْ صْبَاحِي
نَبْغِيكْ گْبَالَة
نْگُولْ لْگْرَانِي
انْتِي لالَّة
انتِي سَاكْنَة هَاذْ الْحَالَة
نَبْغِيكْ فْصُورْتِي
مْرَايَةْ ايَّامِي
شَدِّي حْبَالِي
فَرْزِيهُمْ حْبَلْ عْلَى حْبَلْ
طُرْزِي لَقْصِيدَة
فْدِيوَانْ مَجْدُوبْ
فْصْدَرْ حْنِينْ
فْطْبَلْ گْنَاوِي
نَفَّارْ احْلامِي
حَلْبِي لَغْرَامْ
وشرْبِي حْلِيبُو
شَمِّي نْسَامْ
الْوَرْدْ وطِيبُو
وَانَا
نَطْفِي نَارْ اللِّيعَة فْحْلِيبُو
نْغْرُسْ ازْهَارْ الْعَاشَقْ لَحْبِيبُو
تَفْرَحْ الْخَطْوَة گدَّامِي
سَهْرِي فْجْفُونِي
سْلامْ الرِّيحْ
لْرْيَاحِي سْلامْ
ورِيحِي يَطْرَبْ لَجْفُونَكْ
يْفَاجِي تَخْمَامِي
شرْبِي كَاسِي
رَسْمِي سِنْدِبَادْ
فْكُنَّاشْ
فْبْرَيَّة بْلا جْوَا
فْلْثَامْ خْفِيفْ فْالشُّوفَة
فْضْرِيبْ الْفَالْ
وفَالِي هَاجْ مُوجُو
يْبَلَّغْ سْلامِي
طلِّي عْلِيَّا
يَبْرَدْ حَسِّي
يْسَلَّمْ عْلِيكْ
فْشْجَرْ مْدَلِّي اغْصَانُو
الْوَادْ يَشْرُبْ مَاهْ
مَنْ ثْلُوجْ
مَنْ عْيُونْ
غْرَامِي
فُكِّي حْجَّايْتِي
بْالْمَرْفُودَة يَا لالَّة
هَا لالَّة مِيرَة وگْنَاوَة
هَا بُوجْمِيعْ وبَاطْمَا
وبَاكُو بْالْهَجْهُوجْ
يْسَرَّحْ انْغَامِي
غَطِّي رَاسَكْ
سَالْفَكْ غْطَا رَاسِي فْخْيَالِي
خَلِّي سْمَاكْ تَمْطَرْ شْتَاهَا
يَرْوِى تْرَابْ خَطْوَاتِي
وتْجِيكْ مْوَرّْدَة
فْبْهَا لُونْ شْفَايْفَكْ
فْسَعْدْ جْلالَكْ
يْشَالِي
بْغُرْبَةْ هْيَامِي
هَا وَعْدِي بَرَّدْ غْدَايْدُو
عْلَى سْطُورْ
نْگُولْ رَاهَا قْصِيدَةْ سَرِّي
ورَحْمَةْ شُوقْ كْلامِي.