|
عديت الاربعين
اربعين سنة عديت في حياتي
وبدات ورقتي تذبال و تصفار
غيتني يا عاتق لرقاب
......
كن ونيسي في يوم مماتي
في حماك زكت يا ربي يا غفار
لا تخليني خلف الباب
......
فاجي كربي و اكشف غماتي
في ساعة لهوال جعلني صبار
يا ربي خفف لي لعذاب
......
من عذاري طلو شيباتي
عنوان للكبر و نقص في لعمار
اعتقني يا رب الارباب
......
موعود ربنا بنعايم جناتي
يقين به جانا طه بشار
واردة في سنة وكتاب
......
وانا ما درت مزية في حياتي
نبكي فعالي و ذنوبي لكثار
من قصد مولانا ما خاب
......
على خدي سالو دمعاتي
عيني باكية قلبي في تكدار
ارحمني يا نعم الوهاب
......
اكتر همي و زادو غصاتي
ذاتي فانية و زماني غرار
نفسي ظالمة شيطاني غلاب
......
في اللهو قضيت جميع اوقاتي
نسيت السؤال و يوم المحشر
و ساعة الميزان و الحساب
......
في اللوح نصيب جميع زلاتي
نصيب سيرتي مكتوبة في سطار
ما عملت نوجدو في كتاب
......
من تخمامي طلعو زفراتي
نرجا شفاعة الواحد القهار
كنت غري مازال شباب
......
كيف انا كنت شقي من العصاة
غايس فبحور الدنا و عمية لبصار
ليوم لملاقية ما نضرب لحساب
......
غافل ديني مقصر في صلاتي
ناسي نفسي غرني يبليس المكار
سهمو لاحني و رماني بنشاب
......
ما حجيت ولا وفيت زكاتي
غواني شيطان الهوى و رماني فشرار
في فراش الخطا نتقلب تقلاب
......
و اليوم طلبت خالق لشياتي
يقبل توبتي يمحي لي لوزار
ليك نتضرع يا وهاب
......
وهن عظمي و كترو علاتي
قرب وقت الرحيل لديك الدار
بكيت بالدموع و طابو لهداب
......
يوم يردو عني لحداتي
قبري حفرة مظلمة من تربة و حجار
ربي اجعل سؤالي مستجاب
......
عند الوقفة تبت خطواتي
خمسين الف سنة نحسب في نهار
كداك شاهدة آيات الكتاب
......
هاجت روحي و فاضو نجلاتي
نطلب خالقي بالليل و بنهار
يهو ن عليا فالمكتاب
......
يستر عيبي يمحي سياتي
بجاه النبي عدنان المختار
شفيعنا في يوم الحساب
......
و سلامي على لشياخ ساداتي
فرسان النظام ارباب الاشعار
كافة لدهات و لقطاب
......
و اسمي موضوح في ختام لبياتي
حسن حاجبي فالاصل والدار
من سترك تعمل ليه حجاب
حسن الحاجبي
نور الأدب (تعليقات الفيسبوك)
|