إذا عرف السبب بطل العجب !
حيفا حبيبتك استاذة هدى ونحنا الزوار ، من يخبرنا إذا عن الحبيبة ؟
عندما كان الحديث يقترب من حبيبتي هبيت وصرخت بأعلى الصوت هي قدسي
وأنا من يركض في حاراتها ويفتح أبوابها السبعة ومن هو أخبر مني بذلك؟؟؟؟؟؟؟؟
وعلى فكرة يا جماعة في نقطة مهمة انا حكيت لناهد عنها ولكن يمكن ما أخذت بالها
وهي انه هذه الجولات لا بد فيها من تبادل الأحاديث الشيقة ولا نعتمد فقط على السرد
السرد كله موجود وموثق احنا فقط نريد الإشارة إليه من خلال أحاديثنا الشيقة ولكن لغاية
الان ما فتحنا ولا حديث حلو وما حدا سألني وين كنت تلعبي بالقدس ؟ وين بدك تستضيفنا ؟
شو بدك أنت تحكي لنا عن القدس بعيونك أنت ؟ متذكرة استاذة هدى الفستان اللي وعدتيني
فيه لما نرجع ما حكينا عنه ؟؟؟؟؟
وانت استاذة هدى لازم انت تحكي عن حيفا بعيون هدى الخطيب ؟
كيف بتشوف هدى الخطيب حيفا ؟ كيف بتحلم فيها ؟
عشان احنا ندخل معك بحلمك ونسافر معك لحيفا
احبائي
خلونا نتحدث .. نحكي .. نحكي طرائف صارت معنا هناك
طبعا ً اللي عاشو هناك مثلي ههههههههههههه
ياللا تحمسوا وبلش رشيد قول لنا عن ذكرياتك في حارة المغاربة
أنا أصلا لسة ما حكيت الكم عن مشاويري في حارة المغاربة
وآآآآآآآآآآخ قديه أكلت قتلتات من ماما عشان بضل أروح هناك
وهي تقول لي يا ميساء لا تزرقي من باب الدار على السكيت وتروح من دون ما تحكي
لازم نعرف وين بتروحي والا بيخطفوك .ههههههههههههههه
وطبعا ً ما كنت أرد عليها وكنت لما حدا يسهى عن باب الدار اللي كانت كبيرة جدا ً
بيسموها البيوت العربية يعني صعب جدا ً واحد يضل يراقب باب الدار
فكنت أهرب وأضل من حارة لحارة وانا كان عندي اصحاب هناك
كان عمري 5 سنين وما كنت أخلي حارة تعتب علي ّ
في الآخر لما إجينا على عمان تنفست إمي الصعداء عمان ما فيها حارات
أحبتي بانتظاركم تحكوا شوي ... شوي بس
واستاذة هدى انا عم استنى أشوف حيفا بعيونك
ونصيرة انت فعلا فلسطينية أكثر منا
ورشيد بعد
وبوران وناهد عن جد انتم موسوعة متنقلة وصدق ابن عمي صبحي فيها
الله يعطيكم العافية ودمتم أحبتي