أنا روحي فراشة وهيمانة
ف رحاب النور
وكأنها ريشة ونشوانة
ف جناح عصفور
وبريق الضى مخليها تطوى المسافات
من غير جناحات طايرين بيها
بتعدي بحور
أنا روحى فراشة وهيمانة
ف رحاب النور
***********
وصفاء النفس الشفافة
فوق أي قانون
وانا روحي دي نسمة وهفافة
تسبح ف الكون
هايمة ف ملكوت الرحمن
والكون ترنيمة وألحان
عاشقة وساعات يبقى العاشق
زى المجنون
أنا روحى فراشة وهيمانة
ف رحاب النور
***********
من سجن الجسم الانسانى
فكت قيدها
وكأن النور الرباني
طالب إيدها
بتصلى صلاة الحرية
من بعد سنين العبودية
وتعود للنفس تذكيها وتطهرها
تغسل أوزارها توضيها من بحر النور
أنا روحي فراشة وهيمانة
ف رحاب النور
شعر: محمد العقاد