أزجال حسين بيكار ( 1 )
(فنان تشكيلي وصحفي و زجال مصري راحل )
عدالة السماء
إيه يعني شوية أسى , وإيه يعني حبة ألم
وإيش تكون كل الآلام لو قارناها بالنعم
الدنيا فيها ألم و أنين , لكن كمان فيها النغم
والعيشة من غير ده وده , تبقى بعيد عنك غم
دروس من الحياة
علمتني الحياة ان سهم يصيب و سهم يطيش
وعلمتني الدنيا ان الأناني ياخد و لا يعطيش
و علمتني الحكمة ان الجبان يعري ولا يغطيش
وعلمتني الكرامة أرفع راسي ولا أوطيش
الحظ أعمى
واقف على الناصية , وبيبيع ورق يانصيب
وبيوزع على الناس حظوظ .. وهو مالهش نصيب
ياللى بتعتمد على الحظ وقت الحاجة و في اليوم العصيب
الحظ غادر وطايش .. و نادر لما سهمه يصيب
إعرف نفسك
أنا اللي بعضي من تراب الأرض , وبعضى من أثير
أنا الظلام و النور .. وجوايا الصغير و الكبير
أنا اللي ممكن أزحف على بطني , وممكن في الهوا أطير
أنا الشر لو أطاوع نفسي .. وكل الخير لو يصحى الضمير
بحيرة البجع
موجوع واقف ع السور , يتفرج على بحيرة البجع
ويشوف الوز اللي رايح .. ويشوف الوز اللي رجع
ويشاهد اللي على الميه عايم , واللي في الضلة هجع
ويتعجب على البط اللي بيعلم ولاده العوم والدلع
منظر صحيح بيفرح ... لكن مايشفيش م الوجع !!
سحابة صيف
عارف يا طويل العمر , يعني إيه سحابة صيف ؟
غمامة فايتة في السما زي الشهاب و الطيف
وكل واحد في الحياة عابر سبيل , أو ضيف
والعمر واحد .. لو كان ع السرير أو بحد السيف