من أزجال حسين بيكار (4)
فنان تشكيلي و صحفي و زجال مصري راحل
لغز إسمه الحياة
الطفل .. والشاب .. والصبي .. والعجوز
حروف في سفر الحياة .. زي الألغاز و الرموز
ومش كل حفرة ف طريقك تلقاها مليانة كنوز
ومش كل أمنية في حياتك تتحقق لما تشتهي و تعوز
الكون العجيب
الدنيا كورة مدورة ..
بريشة فنان متصورة
ساعة مضلمة .. وساعة منورة
طول عمرها بتمشي لقدام ...
ومش ممكن ترجع ورا ... !
هكذا الإنسان
في دنيا الرحم ياابن آدم عديت من الشهور تسعة
وفي دنيا العذاب جيت .. عشان تشقى وعشان تسعى
وليه ماليك الغرور مادام ما تستحملش م الناموس لسعة
وليه ماترحمش العباد .. مع إن رحمة ربا واسعة
سؤال بلا جواب
من جهله كان فاكر ان السعادة في الغنى و راحة البال
سأل الحكيم : ليه واحد مش لاقي اللضا .. والتاني عنده ميت فدان ؟
وليه واحد لحافه حرير .. والتاني نايم في الخلا بردان ؟
وليه الحظ أعمى .. بيدي الحلق للي مالهش ودان ؟
قال الحكيم : صبرك يا ولدي .. ده كل وقت وله أدان !!
ذهاب بلا عودة
مسافر بقلي زمان .. وشايل شنطتي
وتايه بين البلدان .. مش لاقي محطتي
لا قادر أقف مكاني .. وأغير خطتي
ولا قادر أرجع ورا .. علشان أصلح غلطتي
ساعة الامتحان
النجاح ياابني مش مسرح ولا سيما تدخلها بتذاكر
عشان تنجح , لازم تسهر الليالي الطويلة وتذاكر
واللي يعلمك حرف اذكره.. وخليك للجميل فاكر
ده فضله عمره مايتنسي , وملعون اللي للجميل ناكر
إفعل ولا تفعل
ياللي عايش حياتك محار بين الخطأ و الصواب
وبتسأل على معنى الحلال و الحرام , ولا أنت لاقي جواب
الجنة باب مفتوح .. لا فيه حارس ولا بواب
للي يطهر من الذنوب قلبه .. وربك للعباد تواب
منتهى السياسة
نصيحة لله .. لو تهاجمك رياح الغضب
وتحاول تدمير حياتك .. وتنهش العضام و العصب
غني واتمايل مع الريح زي عود القصب
ده عود الخيرزان لو ينتني عمره ما ينكسر
واللي ينقطم من عناده .. عود الحطب
من التراب للتراب
نصيحتي يابني .. لا تجري .. ولا تمشي على مهلك
وأضحك قوي للدنيا .. عشان الدنيا تضحك لك
وابعد عن رفاق السوء , حتى لو كانوا من أهلك
ولو صابك في يوم الغرور .. إفتكر إن التراب أصلك
تحياتي . د. ناصر شافعي . من أزجال حسين بيكار.