بنت الليـــــــــــل
رَتْباتْ فْ الرْفُوفْ
شَلاَّ حْروفْ
صَنْعاتْ مَنْهَا كَلاَمْ
مَرّة تْزنَّدْ بِه نَارْهَا
مَرّة تْبَرّدْ بِه الجُّوفْ
تَايْهَة غَارْقَة فْ بْحورْ لْقْدَارْ
تَجْري و تْجَاري
حَامْلة معاها الخَوفْ
الخَوْفْ مَنْ رْفَاكَة مَنْ وَالا
مَنْ الأمرَاض وَ الحْبَالة
يُومْ وْرَا يُومْ
ريح يَرْميهَا لْريحْ
مْغَيّْرة لْمْكَانْ
كِيفْ رْمَلْ الصّْحَاري
نْهارْها لِيلْ
و لِيلْهَا نْهَارْ
شَهْدَة فْ حْضُنْ الغْريبْ
هذا قَاري سْوَارُو
وْ هَذَاكْ مْدَوَّزْ لِيلْتُو
وْ رَايْح فْحالُو
وْ قَلْبْها المَسْكينْ
الله عَالَمْ بْ حَالُو
كُلْ لِيلَة
تْنَاجِي نْجومْ الّليلْ و هْلالُو
تَشْكي على البْحَرْ و زْبَادُو
وتْوَسّل لله
يَغْنِيهَا عْلَى خْروجْ اللِّيلْ
وَ يَنَجِّيهَا مَنْ شْرُورُو
يَعْفو عْلِيهَا مَنْ الجَلْيَة
وْ دَوْرانْ القْهَاوي
وْ مَنْ البَلْية
و الجِيبْ الخَاوي
صَابْرَة تْعَدِّي فْ لِيّامْ
حَلْقْهَا شَاحْفْ
وْ ريقْهَا نَاشْفْ
متبوعة بشلا كلام
تسمع
و عاملة لفمها لجام
جاعلة من نادي الليل
محطة لحلام
السهير و الزهو
نطلبو ليها جميع
العفو يا ربي
العفو