[عدنان كنفاني]

يا ريت!

يا ريت يا ليلى تجي شي نهار
عالمطرح الغافي بفيّة دار
هونيك حدْ بيوت منسية
وجرة عسل، شو مخبية أسرار

وعاجذع شجرة كتير ختيارة
حفرنا قلب
جواه خمس حروف
حرفين من إسمي ومن إسمك
وكل الحروف الباقية
بحبك

بتتذكري.؟
كنا نجي في كلّ مسويّة
ومرات لما تهدني الأشواق
آجي لحالي بضوّ فجر جديد
أركض مع خيالك بصبحيّة
نقطّف زهور زهور
ونطيّر فراشات
وكنا على جناحاتها نفرح
ضمّك وقلك
ليش يا عمري ما بنطير.؟
تتبسمي
وعيونك تقللي
ولو يا مجنون.. بعد بكير.!

بتتذكري أيام كنّا صغار..
بتتذكري المريول، والزنار..
وبتتذكري الوردة الـ قطفتيها
وقلتي: إلَك هيِّ.. وبستيها..؟
خبيتها في دفتري الأزرق
ولساتها بين الورق.. تذكار

يا ريت يا عمري تجي حدي
أحكيلك حكايات وتعدّي
وساعة تجي عا بالك حكاية
كل الطيور بهالسما، تهدّي

ويا ريت شي سهرة على النبعة
نقعد مع النجمات
حطك بشختورة وسع قلبي
ونغيب ما نرجع

كنا صغار كتير، وكبرنا
ولساتنا مجانين
نطيّر فراش بها السما
وإحنا معاها نطير

يا ريت يا ليلى نردّ صغار
وضلني شوفك
وكل ما مشيت من حد هالشجرة
بسمع لحن حسّون
صوته حلو
بيحكي معي ويقول:
لوين يا مجنون..!
بضحك بسرّي
بعرفك إنتي العمـ تحكي
وبعرف كمان شوي رح شوفك
وضمك لصدري، والكلام كتير
وتشبّ فينا النار
وبالآخر الآخر..!

تتبسم عيونك المغمومة
تتلبكي، وبتهربي مني
تقولي:
خلص يا مجنون
إعقل بلاك جنون، صرت ختيار.!

ـ ـ ـ