[حسن الحاجبي]

اربعة من النسا في حياتي
صغى وذوق غير بلاتي
وافهم فاللغا معناتي
***
الأولى من النسا في قلبي
ليها وهبت صادق حبي
نتفكرها وتفيض حارة من عيني دمعة
***
التانية من النسا في حجري
هي الروح هي عمري
سبحان الله اللي خلقها واتقن فالصنعة
***
التالتة من النسا في فراشي
سكنات مهجتي ورماشي
فاقت الهلال في ضياه , مضوية في بيتي شمعة
***
الرابعة من النسا عند راسي
هي عز الخلق في ناسي
هي عنايتي وسنادي هي في الحساب كمالة اربعة
***
الأولى من النسا في لكنان
في دواخل العضا والوجدان
قضى وراد نعم المنان
تكون في رياض الجنان
ودعتها وهي في اكفان
والقلب يتقطر باحزان
طلبت الرحيم الرحمان
يشملها بواسع غفران
في جنة الرضا والرضوان
هي شفيع عند الميزان
***
التانية من النسا ماحلاها
ماحلى زينها وبهاها
عدات الكمرة في ضياها
والنجوم وصيفات وراها
نهنا يلا نكون معها
رب الكاينات عطاها
حكمة وتباتة ونباهة
حقق يا كريم رجاها
تدرك فالحياة مناها
وتفرح قلب باها
***
التالتة من النسا محضية
فالقلب والحشا مخفية
سلطانة الريام ترية
مالي سنيد إلا هي
حباتني بدون خفية
ودارت يدها في يديا
في طريق الصفا والنية
وامواج عاتية وقوية
معها دركت الأمنية
درت الرسام والذرية
***
الرابعة من النسا في بالي
لالة النسا لغوالي
مولات المقام العالي
بكمام العز تشالي
هي خير من يحلا لي
هي ظلي وخيالي
هي كنزي ورس مالي
وليدها يقول لي خالي
ياربي تخليها لي
***
اربعة من النسا في حياتي
تسعد بهم اوقاتي
وانا في اختام بياتي
طلبت خالق لشياتي
يتبت في الرضا خطواتي
يمحي كافة زلاتي


حسن الحاجبي