الشرع قال اربعــه .......... وانت معـــاك اتنـــين
واحده كده مسلوعـــه ........ والتانيه عِجل سمين
طول النهار معمعه .......... بين الحريم لِتنيـــــن
دايمًا خناقه ونكد ......... مِحتار تراضي ف مين
محتار تراضي القمر ............ أم القوام غزلان
واللا اللي زي البقر ........... بس عينيها جنــان
لكِنْ تطلـَّع شرر ............ وانت البعيد غلبــــان
آخرتها بالبهدله ............ حتنام حزين منهــــان
قالك صحيح اربعه ........... بس بشروط صعبين
تِعدِل ما بين الاربعه .......... وده حُكم شرْع الدين
طب ليه بقى السربعه ...... علشان تجيب زوجتين
ربك تحدّىَ البشر ............ مين اللي يعْدِل مين !
الدخل شيء محسوب .............. ربك يبارك فيه
والرزق ليك مكتوب ...... وانت اللي جُرْت عليه
وبزوجه واحده يدوب ............ تِقدر تزقطط بيه
ليه تتربط باتنين ........... لو واحده يحصل إيه ؟
يحْصَل بإن الهنا ........... حيكون أكيد في الــدار
وتعيشوا طول السنه ........ ف سعاده ليل ونهار
وتربوا وف حضنكوا ...... أجمل ولاد شـُطـَّار
وتنولوا كل المُنىَ ......... وحياتكوا تبقىَ عَمَار