[ضياء الدين البري]

السلام عليكم .. مجرد رأي
كلام من قلبي

....

إمته ياناس يرجع لنا..؟

..

فينك ياليل
جاي لك عشان
أشكي إليك
النبض تايه في القلوب
والخلق فاقده الانتماء
تاهت معالمه فْ عصرنا
ودّعنا فيه رمز الوفاء
والغوله دايسه فْ قلبنا
بجْحَه وزايده في الغباء
دايما نقول موجود شهود
علي إننا ماحناش أسود
وبرضه قاسيه في العداء
بشروطها ساجنه قدسنا
نهاره ليل ، والكون عليل
فرّطنا فيه ، من غير قيود
حكْمانا حتي فْ حلمنا
نسّـتنا فيه لحن الخلود
وكتير بنخسر في الرهان
فارضه علينا نعيش حياه
من غير ضمير ، والأقصي هان
مرارته ساكنه فْ حلقنا
نبض القلوب ، حزن وهوان
والجبن حطـّم حلمنا
والحـُر تـاه
ودّع وراح
من غير دليل
شايل معاه ، حزمة جراح
صعبان عليه من عزوته
لما فاتوه بره الحدود
والغوله رافضه عودته
حتي النهار ، ناسي المدار
خايف يعود ، من غير دليل
عايش يواسي محنته
فضّل يعيش ، تاني الحياه
من غير مايعرف منتهاه
ينده يا أمه الدم فار
اليأس عشش وسطنا
الأقصي بيواجه دمار
صامد في سجنه وّحدته
ياأمّه مش مالكه القرار
قللتي ليه من شأننا
أطفالنا ماتوا م الحصار
الصبر هدْيت شعلته
والغوله زايده في السعار
واحنا قلوبنا قايده نار
نسيتوا ليه مجد الكبار ..؟
وليه زرعتوا في سكته..؟
شظايا طارحه كتير شرار
والريح شديده هزّته
خايفين تموّت نبضته
دموعه ساكنه في المكان
بتعاني مر لهفته
والغربه أصعب م الكرار
والله هيبتنا كات زمان
كانت بتغسل همّـنا
أيام جدودنا كات منار
في الأزمه تجري تْضمنا
إمته ياناس يرجع لنا
نبض الجدود ، حيْ ودليل
وعيون تحب بدون عيار
قلوب تحن لمجدنا
نحرر القدس الأصيل
والكل يسمع لحننا
فوق الشفايف نور ونار
نرجع أحبه ، عشقوك ياليل
نجوم شقيـّه ، وليل نهار
تنده تلاقي قلوب تميل
يارب فرّج همنا
واغفر ذنوب
قبل ماندخل قبرنا
واجعل هدانا في القلوب
القدس يرجع قدسنا
قبل الممات ، نلحق نتوب

...........

أشكركم
وللجميع تحياتي