[ناجية عامر]

آش دانــــي لشي آمتحان

آش داني نحضر
واخا مراجع و محضر
كيف العادة
كان جوابي عل لوراق
مسطر و محرر
ف البدية طل عليا الزهر
بكيت على زمان الغش و لغدر

رفرف علامي
عولت عل الفرح
وجدت لبخور من مسك و عنبر
لكن هيهات
على آصحاب الصرف
سمعني يا صاحبي
يا الشاد معايا الصف
خوت الجوا و الظرف
محاوني بالكومة
علامي عل لأنظار غبر
ما أنا عدوهم
ما هم عدياني
الغش شفتو بأم عياني
لا حد فيهم سماني
عطاني حقي و رقاني

قبل ما يصحوا لوراق
و يشوفو المضمون
تساءلوا هدا شكون
شكون لغادي يكون
واحد من العباد
ايديه ما توصل لقيعان الخوابي
سوالفو رهيفة ما تشطب زرابي
متاعو قليل ما يعمر قراب
حالتو ضعيفة ما تدخل لجياب

فينك يا صاحبي ف شلا وصاف
دوك دياب ف صفة ناس ظراف
بوح أصاحبي و تكلم
ما عندك مناش تخاف
ما آحنا معاطيب
ما آحنا كفاف
كل ما راج بين الناس لظراف
سمعناه و شفناه
آحسبنا زمانهم تغير
لكن أمرهم ما زال يحير
ما زال القابض لعصا من قفاتها يقرر
هدا يدوووووز، هدا يفوووووز
و هداك علموه يصبغ الوجوه و يجير

وا صاحبي ف شلا وصاف
بوح و تكلم را ما عندك مناش تخاف
ما زال شي جلايل خاصهم التكفاف
ايوا آش بان ليك أصاحبي
و لى نصبرو و نزيدو فالصبر
نكمدو الجرح و نتقبلو المنظر
نخليوها عل الله
نخليو الغارفين من بحور لحرام
يزيدو يغيسوا ف دنوب ليام
لي بان ليك نديروه أصاحبي

ناجية عامر في 13/10/2010