[فتيحة الدرابي]

يا وجاعي يا لمألماني
يا السارقة النوم من عيوني ليالي
يا اللي بجمارها كاوياني
وانا صابر واعليها انداري
يا وجاعي يا لمألماني ، بالليل امسهراني
وبالليل بين إيدين الطبة امضوخاني
أنا من حرك نبكي
والناس اللي ما جرباتك ما امصدقاني
من الداخل بحال السوسة ناخراني ومهدماني
ومن برا غيرتي فيا كل الواني
مالك ياوجاعي على فراشي امواطياني
واش هاد الحال عاجبك ديما المرضاني
ولا والفتيني وما ابغيتي اتفرقي امكاني
يا وجاعي أنا ما نبغيك حتى العدياني
لكن شوفي غيري خليه يتكبد ويعاني
حتى يحس بالناس لمراض بحالي
ويمكن إلى جربوك إيكفوا من لمعاني
ها العار اعليك راه الألم اغزاني
والدواء والطبيب ما اشفاني
يا وجاعي بعدي مني
وانساي اسمي وحتى عنواني
اشربت منك ما اكفاني
عديت النجوم وانا واقف وحداني
انضرع لله الباري
يشفيني ويبعدك اعليا من ثاني
وترجعي ليا يا ايامي وتزياني
وتعود الضحكة اللي بعداتها احزاني
وتشملني الصحة والعافية
في الباقي من ازماني
فتيحة الدرابي