[شريفة السيد]

نظرا لعدم وجود نقدية.. بنوزع على الغاليين قصايد عاطفية.. هات إيدك يا جميل علشان تاخد العدية...
http://www.facebook.com/note.php?note_id=464086897883
قصيدة جديدة بالعامية المصرية
==================
:
ياحبيبي دا انت بتشتغل نفسك بجد.......!
ـــــــــــــــــــــ
:
صبـَّح لي ع الضحكة البريئة والنبي..
مسـِّي لي ع النظرة الجريئة والنبي..
على قلبك اللي خلى قلبي يعشـقـُه جامد كده
على حبك اللي قال: (يا روحي اطـَّمِّني)
خلاني ادوب في محبتك
خلى الحاجات متلخبطة
مش عارفه مين اللي ابتدا الحب الكبير
مش عارفه مين اللي اغتوى بالتاني قبلا
كنت اسألك: (مين اللي حب التاني أكتر.؟)
فتقول: ( أنا )
أضحك واقول: ( يا حبيبي يسعدني كده.. دي أحلى حاجة..
يا ريت يا روحي تحبني أكتر كتير)
دانا لما بتقوللي بحبـِّك بابقى طايرة من الفرحْ
بانسى عذاب عمري وقلبي اللي زمااااااااااان ياما انجرحْ
فــ تقوللي: ( نفسي تعلـِّمي كل البنات ازاي تحب)
وساعتها بابقى عايزة ألـِفّ صوتك جوَّه منديل المحبه
واشيله عندي في الدولابْ
واعمل جيوب مخصوص لجيبتي
واحطّ فيها كل أنفاسك عشان لمَّا تروح الشـُغل تاني أشمَّها
وأعبـِّي لمساتك في إيدي
زي ما تكون دي العديه.. إللي في العيد خدتَها
..
مسِّي لي على إيدك قوي
وخصوصًا ( الإيد الشمال )
إللي بتعمل خيمه على إيدي اليمين
وباحس فيها بكل معنى للحنين
وباشوف هوانا تحتها عايش سنين
مايموتش أبدًا يا حبيبي مهما كان
يا سلااااام على الإيد الشمال
لما كتبتْ عليها انا كلمةْ ( بحبـَّك )
وانت قلت: ( خلاص بقى
من يوم ورايح إيدي دي محتاجة يعني معامله خاصه لوحدها )
وقعدت شهر تقول لي: ( لأ ما غسلتهاش )
..
سلم لي ع الإيد اليمين
ع الخد والرمش الكحيل وعلى ( الجبين )
وعلى الندى... إللي بيطرح يووووووووه فواكه:
منجه تفاح وابتسامات زي عناقيد العنب
يا بو قلب أغلى من الدهب
..
تصدق بإيه...؟؟
رغم انك انت قلت لازم نفترق
حاساك.. وعارفة انك بقيت كداب قوي
بتحبني ومتأكده وعارفه ان دي أول عمايل الحب فيك
وانا أول الأيام معاك
بتحبني وبتغير عليا، بتعشق الفرحة ف عنيا
تدوب بلمسة من إيديا
وتكره اني أغيب ثواني عن عنيك
..
تصدق بإيه.....؟
رغم انك انت قلت لازم نفترق
شايفه جناحات روحك يا روحي جايبه قلبك عندي انا
شايفاك بتبكي من بعيد
وسامعه شــحتفتكْ عليَّا
وحاسَّـة بالقلق اللي بيخليك خلااااااص هتطلب نمرتي وترجع تكابر
قال إيه يا روحي ما بحبكيش.....؟!!
يا حبيبي دانت بتشتغل نفسك بجد....!!!
--------------------
شعر/ شريفة السيد ...
7/9/2010