[محمد أبو زيد الأسيوطي]

ذنب بلدنا / للشاعر محمد أبو زيد الاسيوطي

مش عارفين
ذنب بلدنا في رقبة مين
اللي بيسـرق واللـي بينـهب
واللي بيحـرق فيـها ويشرب
من دم الناس المساكين
واللي معاه سكين
بيقطع ويبيع فيها ومش بفلوس
واللي راميها
في جيب حراميها
واللي عشان مصلحته يدوس
على أحلامنا يلم فلوس
ويحول بره بالملايين
واللي بقاله سنه وسنين
مش راضي يقوم
من علي كرسيه فاكر إنه مفيش بعديه
رافض يبقى في يوم
مرحوم
فاكر إن الكرسي يدوم
طب لو دام كان يوصل ليه ؟
واللي فى عمره ما يوم أهتم
كالنا المم وحلى بدم
المصريين
واللي يتاجر في الأرواح
والسفاح
واللي بيسخر من أفكارنا

ومفكرنا

إننا مجانين
واللى جرينا وراه حافيين
مش عارفين هيخدنا لفين
واللى لاعنده ضمير ولا ذمة
واللي ما لوش لا يمين ولا كلمة
واللي ما عندوش مله ودين
واللي مفكر مالنا حلال
عبى وشال منه جبال
واللى يقولوا
رجال أعمال
ليل ونهار
بيتاجروا في قوتنا
خربوا بيوتنا
بالإستغلال
واللى يسوق في الإستهبال
حاجه خيال
واللي بيحصل فينا دا شىء
فوق الصبر
مين هيطيق
مر العمر
علينا وفات
في الأزمات قلبنا مات
ولا غرقنا في الشهوات
علشان كده ربنا غضبان

م اللى بيحصل فينا

يا عين
حتى في شرع الله والدين
تلقى مشايخ مش فاهمين
يفتي الفتوه يا ناس من دول
لأجل ما يرضي ناس تانيين
عنده يزعل أي رسول
ميزعلش المسئولين
وفى دعـــواه ميكنش أمين
لاجل يرضي من ولاه
عيني علينا يا حول الله
دينا وذنبه في رقبة مين
مش عارفين
اللي بيبني بالأبراج
واللي يقول أزمة إسكان
والمحتاج
لساه محتاج تايه ضايع
في الأحزان
خايف يعيى مفيش لا علاج
ولا في مال عنده
يوديه
لطبيب يداويه
يعني يا ناس وبدون إحراج
حاله عدمان

دا الغلبان

ضاع في النص
واللي أتحكم فيه بيرص
بالأكوام
في الكتمان من غير حتى ما حد يحس
واللي بيحلم يوم بالرخص
يلقي الدنيا مولعه نار
و الأسعار
عمال تزيد باستمرار
ليل ونهار حاجه مرار
نص الشعب فقير كحيان
وسط بحور الهم بيغرق
والربان معايزشي يصدق
ولا بيحس
نار العوزه بتضني وتحرق
هوه الفقر مسك في بلادي
للدرجادي
للدرجادي بلدنا فقيره ولا غنيه
طب فين هيه
ليه مش باين
خيرها عليا
ولا اولادي
ولا مفيش عدل وتسويه
ولا بلادي
مستهتره بولادها وبيا
ولا العيب في الشعب وفيا
دانا مش خاين
دانا بتمنى تراب رجليها
وبموت فيها
دانا افديها بروحي ودمي من اي اعادي
واستعدادي
أدي زيادة
بس انا نفسي نعيش في سعاده
بلدي يا ناس للخير ولاده
مش محتاجه
نفسي يكون للظلم عنين
يرأفوا حبه بناس عايشيين
مش عايشين
ونقول إيه والمسكين
مش لاقي القوت
حتي الموت
مش راضي يجيه
مهما ينادي بعلو الصوت
مش سامعين
ولا عايزين يعمل ايه؟
يسرق زي ما كل بيسرق؟
لاجل يعيش أصلي مفيش
في جيوبه جنيه
لما يجوع يآكل بعضيه
يعطش بحر مرارة ساقيه
ومغطيه
برد الليل ويخاف حتي الصبح يصبح تاني عليه
ما هو مولود غلبان وفقير
في زمن فيه
المحتاج كله بيرميه
ما هو مش لاقي حد يعين
يشكي ويبكي بدمع العين
مين مسئول حد يقول
اللي بيحصل فينا شويه
نشكي لمين يا ولداه
اصل الشكوي لغير الله
تبقي مذله
تبقي إهانة تبقي ممله
نهش الفقر قلوبنا ما خله
كله بيلعب وبيتسله
بالغلبان المظلوم
اللي عشاه صبر ونوم
مهما الأمراض تنهش فيه
ربه حامية تاني يقوم
علشان حاسس انه وراه كوم
أطفال لو يوم مال
مين هيشلهم
ليل ونهار
عمال شغال زي حمار
لاجل يأكلهم
مين هيساعده الا سواعده
كل ولاده في التعليم
أيوه عظيم
بس منين هيجب مصاريف
شايف يومه وأمسه مخيف
بس بحلم برضوا بكرة
ويقف وحده في التيار
فارس
وأقوي م الفرسان
ليل ونهار وسط النار
بيحارب فقره
شارب جدا م الأخطار
لكن قانع مش بيمانع
حامد ربه
ساكن قلبه أقوى ايمان
مبيرضاش أبدا بحرام لو يوم نام
أو بات في الشارع
فيه القوة يناس بتصارع
ولا يقبلش في يوم إحسان
جايز فعلا معهوش قرش
لكن نايم فوق الفرش
خالي البال ماله حلال
بارك فيه المولي عشان
طالب ستر
مش شيال في المال
بيهيم دا بملاليم
عايش مستور وسط النور
عمروه ما زور
ولا قال زور
عمره ما قال للغير محتاج

عمره ما يغدر بالأوطان

ولا باع مرة ضميره وخان
قلب إنسان
يحمي بلاده من العدوان
عمل الواجب قوي وزياده
ربي ولاده علي القران
كله حياته دين وعباده
عنده إراده وكله ايمان
حامد ربه
أصل الفقر يا ناس مش ذنبه
آمال ذنبه
في رقبة مين
مش عارفين
وأنا واحد
من بين ملايين
أنسان عادي
خدت شهاده بقالي سنين
قلت يومين
وهلاقي وظيفة
قالو مفيش في بلدنا وظايف
بعينك شايف
قلت يا ناس أعمل مشروع
بس رصيده
أجيبه منين سلف ودين
وفلوس بالفايض
حاجه مخيفه
أبدء رحلة عمرى بدين
مش ح اداين
مرة سنة وسنين
مش باين
ليها جواز أي جهاز
محتاج لفلوس وأنا منحوس
والمنحوس
هيجبها منين
الله يعين
عدي وفات من عمري سنين
سنة سنتين قول عشرين
قول تلاتين قول خامسين
قول أنا ذنبي
في رقبه مين
أنا والفقره المصريين
مش عارفين
شكرا لكم وتحياتي الشاعر / محمد أبو زيد الاسيوطي