[عبد الغني الراقي]

يا عَرَب : رئيس و زعيم وشيخ وأمير وسلطان
ساسة و قادة وسادة وغْنادر ومسؤولين وأعيان
يأْسي منّْكُم ف قلبـي تصلّب وحْلف ما يلْيان
وضاقت بيكُم حالي ومن الإنتماء ولِّيت حشمان
مهمول ف حُضن حماكُم منبوذ ف الغربة حيران
ومتهوم إرهابـي بْلا حُجة ثابتة عليا وبلا برهان
قُنبلة موقوتة وكأنـي محقون بْشُحْنة من بُركان
وأَنْفاسي محصية وخطواتي مرصودة ف كل مْكان
واش نـمْحي من صدري حرف هويّتي ولغة القرآن
واش هَذا حق أو باطْل ياشْيوخ أَواخر الزَّمان
في قْلوبكُم تربّْعات الأَحقاد والفُجور والخِدلان
ومن فرط فُجوركُم ضاعت مني القيمة والشان
غايبين ف غيبوبة ومْحنّْطين فْ كان ياما كـان
وْلا خطوة مْباركة وْلا نـخوة وْلا دْراع سْخان
من فيكُم "قال أنا" يبرز ف الساحة والـميدان
ويرفع الضيم ويْدوس لـمْهانة ويسْحق العديان
باقْية خْطِيوة والسكة تخرق مكة والمهدي مابان
ضيّعتُو بغداد وعْلى أَرْضها تمشّات قْدام القرصان
وسْفونكُم غارقة وْلامْراسي وْلا رايّْس لا رُبَّــان
محزمين بالفُحولة وأَهدافكُم ف أَرداف النسـوان
وغارقين ف اللذة وناسيين الدَّوام لله الديــان
من فيكُم يقدر يدخل للقُدس ويتْخشّع للرحـمان
ويصلي ويخطب ف الـمنبر والصَّدَى يْهز الأركان
من فيكُم يفك حِصار غزة ويهدّ فولاذ الجـدران
بْلا غزة ما تكون كينونة وما يْكون ليكُم كِيــان
بلا غزة لا مسلم لاعربي لا مذهب لا أُمَّة لا إِيـمان
بلا غزة لا قيمة للقِمَّة لا ضمير وْ لا دُنيا لا أَدْيان
واللي فيكُم زَعيم ينطق ويْقول غزة أو الطوفـان