[طارق شهاب الدين]

ينتقم منهم يا مصر إللي خانوكي
قرطسوكي وعمموكي ودوخونا ودوخوكي
ينتقم منهم يا مصر إللي رموكي
بين جهنم إسرائيل وسعير الأمريكان دمروكي
ينتقم منهم يا مصر إللي باعوكي
وبسلاسل كامب ديفيد والندامه قيدوكي
وفـ تبوت الأمركه حنطوكي وفرجو الدنيا عليكي
وبالسلامه بعدها فـ ليله ضلمه شيعوكي
ساحل شمالي يهودوه ويهودوكي
عملوا بيتش لليهود وجوعوكي
وإبنك يا مصر خد صابونه فلسعوه وفلسعوكي
بيعو ابنك حمارته وركبوه حتة سزوكي
سكنوا كل حمار فـ قصر وبنك فـ قبر سكنوه وسكنوكي
أكلو شعبك فراوله وأكلوه كل الأونطه وسلموكي
والتكيه شالو تك وحطوا منوفيه ومنوفيكي
نايب حمار نايم فـ غار ماحسسش بيكي
إللي يدفع يدخله العسكريه وخرجونا وخربوكي
واللي ما يدفعش جامعه أهلي دخلونا وخيبوكي
والدولار صار ابن باشا وشحتونا وشحتوكي
وبن بلدك عريان جعان وان قال حرام يسجنوه ويسجنوكي
من قبل فرعون للمبارك سلاطينك بلطجيه بينهبوكي
ينتقم منهم يا مصر إللي باعوكي
مزروعه كما غطان القمح جوانا واحنا جواكي
مليون سنه بيحاولوا فيكي يقتلونا وفينا يقتلوكي
سيدنا بوش أغبى غبى عامل نبي وهيسرحوكي
قطعوا عنك حجابك وبكره إيه هيقلعوكي
قلعوكي توب الطهاره وقالوا عولمه وبمهاره عولموكي
وفـ ليله غبره وبطرحه سوده لون ليالينا جوازه عرفي جوزوكي
وكان وليك إبن العبيد ووليهم سفاح أكيد وجنزوكي
وأخدنا سينا مهر للحلم اليهودي بالبر كله وحيدوكي
وادوله نوبل يادي الهنا وقنطرونا وقنطروكي
قدموا صدام للحرب بغباوتنا وذكاهم واتخلوا عنه ونادو عليكي
رحتى تجري بباروده عاميه ما فرقتش قتلتى أخوكي
دبحتى زوجته وقتلتي إبنه وكسرتي ضهره وضحكوا عليكي
إصحي يا أمه وصحصحي دانتي جوانا الأمل فـ سكه تايهه من خطوتي
إنت يا مصر العظيمه همستي وضحكتي ودمعتي
وان تهت يامه مهما تهت حضنك حصيرتي ومخدتي
يا مصر يا نيل يا هرم يا شفايا يا دوايا وعلتي
ياصبرنا علي إنهزم واللى سرق واللي ظلم يا أحلى كلمه فـ جملتي
آن الأوان تطلقي وتلبسي تاج العلا وتتستتي
وتصلي فـ الأقصى الشريف أنت وكل الطيبين من حتتي
لابد يرحل شارون والأمريكان لو بآخر سهم يامه فـ سلتي
يرحل معاه الكدابين والنصابين والمعتوهين من أمتي
يعلا الأدان وتلالي ليالي القدس بفرحتك وبفرحتي

[نصيرة تختوخ]

رغم كل الحسرة جاءت الأبيات الأخيرة خاصة تفيض وطنية و حبا يمسح كل الأسى
تقديري و تحيتي

[طارق شهاب الدين]

بوركت أختي نصيرة
مرورك شرف لهذه الخواطر
طبت دموما وطابت أيامك بالسرور

[مرمريوسف]

الأخ الفاضل /طارق

الله عليك كلمات فى الجون ربنا يحمى مصر ويحمى ولادها عندك حق هم فعلا ضيعونا وضيعوها ربنا يستر .

[طارق شهاب الدين]

شرف لي مرورك مرمر
بوركت وظلت مصر مرفوعة الجبين
بالشرفاء مهزوم جبناؤها وإن إعتلوا الأسوار كالصوص
شرفني مرورك