[ليلى مرجان]

امّي الغالية

قْرَيْتْ كْتابْ الغالية

لْقيتِها ما سامْعَة ما قارْيَة

لكن كانت سارْيَة

هازَّة الدّارْ العاليَة

بْصْبَرْ بَرْدّاتْ النّارْ الكاوْيَة

وُ سَكْتاتْ وُ عْليها ما هي داوْيَة

قُلْتْ ليها أَمّي الغالية

شْكونْ فْ سْماها نْجومْ عاليَة

واشْ نَسْوانْ زْمانَكْ

و اللاَّ نَسْوانْ وَقْتي الحالية

طَلْعاتْ تَنْهيدَة مَنْ لَعْماقْ

وُ نَظْراتْ لِيَ بْ عَيْنْ الإشْفاقْ

وُ رَدّاتْ عْلِيَ بْ لْسانْ الْحُّذَّاقْ

داكْ الزْمانْ ضاقْ وُ هادْ الزْمانْ ضاقْ

حَيْرَتْني بْ جْوابْ ما هُو فـَرّاقْ

بِيْنْ زْماني وُ زْمانْها اللّي عْليها ضاقْ

خَبْلاَّتْ خَيْطْ كْلامْها

ما عْرَفْتُ سالَ وُ اللاَّ باقِ

قُلْتْ أَمِّي الغالية

واشْ كْلاَمَكْ فيه القَصْدْ

وُ اللاَّ مَعْنَى خاوْيَة

رَدّاتْ آه يا لَمْرا

فْ زْماني ما كُنْتْ حُرَّة

هازَّة حْمَلْ الدّارْ وُ عْليهْ صابْرَة

ما كُنْتْ قارْيَة و لا دارْيَة

وُ كُنْتْ سانْيَة بها لَمْياهْ جارْيَة

طاحونَة تْدورْ نْهارْ وُ لِيْلْ

نْزَّنَّدْ الكانونْ من صَهْدْ قْليلْ

دْموعْ دُخّانُ من عَيْني تْسيلْ

عْجاجَة نارو حَرْقاتْ لي لَوْجَهْ وُ لِدينْ

عْلى عْوادُ نْساوي الطَّجينْ لَبْنينْ

وُ خُبْزي عْليهْ مُحَمَّرْ؛ زينْ لَعْجينْ

نْقَدَمْ لَمْواكَلْ فْ كُلْ وَقْتْ وُ حينْ

للعايلة والرّاجَلْ وُ وْلادي مجموعينْ

لْباسْهُمْ تَظْهَرْ عْليهْ نْقاوَتْ ليدينْ

نْفَرْكُ مرَّة وُ اتْنينْ

وُ نْخَلّي رُيوسْهُم بينْ قْرانْهُمْ بالنْقاوة مَرْفوعينْ

نْكُسْ الزْريبة و مَنْ نْكاسَتْها

يَطْلَعْ سْمادْ لْزْرَعْ زين

نَحْلَبْ لَحْليبْ فْ لَفْجَرْ

نْمَخْضُو بينْ صْباحْ وُآظْهُرْ

جَهْدي فْ رَغْوْْتُو تَظْهَرْ

نْخَرَّجْ زَبْدَة فُوقْ اللْبَنْ تَتْبَخْتَرْ

نْمَلَّحْ منْها سْمَنْ زينْ وُ حارْ

نْوَدَّحْ بْ تيغَشْتْ صوفَةْ َلَغْنَمْ

انْشَرْها فْ الشَّمْسْ تَكْرَمْ

انْفَضْ خَمْلَتْها بْ قُظْبانْ طْوالْ

نَمْشَطْها مْشيطْ بالخَلْخالْ

وُ نْقَرْشَلْها صافية بالقَرْشالْ

وُ مَلِّي نْقِّيها يَرْتاحْ البالْ

نْغْزَلْها خْيوطْ بالمُغْزَلْ

سْبولَة وُ سْدى منها نَعْزَلْ

نْوَقَّفْ المَنْجَجْ بْ عْوادْ وُ قْصَبْ

ما نْخَلي عَيْني منُّو تَغْضَبْ

نْسَديهْ بْسْدى يَعْجَبْ

وُ نَجّو بْطُعْمَة بْحالْ الدْهَبْ

مْشَكَلْ بْزْواقْ وُ لْوانْ

نْـﯖَرْجو تَـﯖْريجَتْ الفنان

ما نْخَلي العَيْبْ فيه يْبانْ

نَصْنَعْ منه فْراشْ عْليه لَحْبابْ تْنامْ

وُ غْطى يَنْفَعْهُم على طولْ لِيّامْ

وُ يْدَفيهُمْ من بَرْدْ ليالي حيّان

وُ اللاَّ سَلْهامْ وُ جَلابَة دَرْعة

أو خْفيفة وَلا بْـزيوية

بينْ الجْماعة بها الرّاجَلْ يَتْباهى

بْقاتْ غيرْ الذكْرى منهم مَرْوية

و إلى ساليتْ وُ بْغيتْ نَرْتاحْ

نَـﯖْلَسْ عْلى المِيدا عْشِيا وُ صْباحْ

نَّقي الزْرَعْ قْناطَرْ مَصْفوفَة فْ لَمْرَحْ

نْعَمَّرْ به لْمَطْمورْ

وُ هكْدا أيَّامي تْدوزْ وُ تْدورْ

أمّا انْتِ يا بَنْتي

فْزْمانَكْ مَنْ هادْ الشْقى ارْتاحيتي

ما حَرْقاتَكْ شَمْعة ما عْوادْ الكانونْ دَنِّتي

لْعِلْم خَدْمَكْ كيفْ بْغيتي

بآلاتْ انْواعْ وُ شْكالْ سَهَلْتي

شْقاكْ وُ عْليهْ تْغَلَبْتي

حَيَّدْتي عارْ الجهلْ وُ قـْرَيْتي

وُ تـْنَفَّعْتي بالعلْم وُ تْنَوَرْتي

خْرَجْتي من الحَجْبَة وَ منها نْجيتي

عاوَنْتي اولادك بْ لَفْهامة وُ على قْرايَتْهُم سْهَرْتي

وُ مَلِّي خْرَجْتي بْ جَنْبْ الرّاجَلْ وُ اخْدَمْتي

جْميع الوظايفْ تْقَـلََدْتي

فْرَحْتي حينْ وُصَلْتي للمُرادْ اللّي تْمَنيتي

لكن المسؤولية مسْؤوليتين هَزيتي

تْعَبْتي بْ شْكَلْ آخُرْ وُ ما دْريتي

تَمَنْ الحرية لَحْسابُ ما قْرَيْتي

تْقالْ عْليكْ لَحْمَلْ وُ ما ليه حْطَّيْتي

هازَّة تَعَبْ العَمَلْ

وُ شْقى لَولادْ اللِّي تْحَمَّلْتي

مَنْ هنا ضاقْ عليكْ الزْمان وُ ما حَسيتي

نَمْلة شَغالة وُليتي

مْقَسْمَة بين العمَلْ وُ الدّار وُ عْييتي

ما قْدَرْتي تْرَجْعي لَحْياتي

وَ لا فْ حُريتَكْ سامَحْتي

فْ زماني جْريتْ وُ انا مسْجونة

وُ فْ زْمانَكْ جريتي و انت مفتونة

جاوِبي على سُؤالَكْ يا القارية

شْكون اللِّي هي نجمة فْ سماها عالية

انت و اللاَّ امُكْ الغالية

ليلى مرجان

الدار البيضاء بتاريخ 2009/04/09

[ليلى مرجان]

................

[فتيحة الدرابي]

نَمْلة شَغالة وُليتي
مْقَسْمَة بين العمَلْ وُ الدّار وُ عْييتي
ما قْدَرْتي تْرَجْعي لَحْياتي
وَ لا فْ حُريتَكْ سامَحْتي


فْ زماني جْريتْ وُ انا مسْجونة
وُ فْ زْمانَكْ جريتي و انت مفتونة
جاوِبي على سُؤالَكْ يا القارية
شْكون اللِّي هي نجمة فْ سماها عالية
انت و اللاَّ امُكْ الغالية.

زجلية رائعة بكل مقومات الزجل المغربي الذي يرقى إلى معنويات الحس والوجدان خصوصا عندما يتعلق الأمر بالمرأة المناضلة المكافحة التي تستحق كل التشجيع والاحترام، مرة ثانية أفول تحية لإبداعك الزجلي الجميل.

[ميساء البشيتي]

زجلية رائعة .. بل هي الروعة بحد ذاتها
جميلة الكلمات جدا
والأجمل المعاني الدفينة
زماننا وإلا زمانهم ..
كلمونا كثيراً عن زمانهم الصعب وظنناً أنه ولى إلى غير رجعة
واليوم نفاجىء بأن زماننا أصعب من كل زمان
الرائعة ليلى لا تتوقفي وأمطري زجلاً كحبات المطر
ودومي أيتها الرائعة

[ليلى مرجان]

و الجميل مرورك الراقي و قراءتك الواعية
شكرا لك أ. ميساء و دمت مشجعة

[بوران شما]

استمتعتُ جداً جداً بهذه الزجلية الوجدانية الرائعة ,
في الزمان تعبت وشقيت أمهاتنا كثيرا لكنهن أحسسن بالمتعة بعد الشقاء
أما نساء اليوم فنتعب ونشقى في داخل وخارج المنزل لكن لا متعة في
هذه الحياة وهذه الأيام .
من أجل ذلك تركت لكِ الوالدة الغالية أن تجيبي أنتِ عن السؤال .
تحياتي وفائق التقدير , وبانتظار المزيد من هذه الإبداعات .

[نوره الدوسري]

الاستاذة الفاضلة // فاطمة مرجان

اقتباس شْكون اللِّي هي نجمة فْ سماها عالية انت و اللاَّ امُكْ الغالية

كلما تذكرنا تعب امهاتنا زاد برنا وزاد حبنا وزاد تقديرنا

فرق شاسع عزيزتي لايمكن تجاهله

الاستاذة الفاضلة //

كل ام متفانية مضحية معطاء مخلصة اخرجت للمجتمع ابناء صالحين ومحترمين

هي بلاشك نجمة عالية في السماء

امتعني هذا الزجل المميز والفكرة الجميلة

تقديري

نورة الدوسري

[Arouba Shankan]

كانت ترافقني موسيقى من نوع خاص ،ترافق السرد الرشيق والتنقل من صورة إلى صورة

لتقبل سحاباتك الماطرة حروفا وألقا ،،نستعذب ،ونقرأ
تحيتي لك أ.ليلى

[ناجية عامر]

الحبيبة و الغالية على القلب أستاذة ليلى،
زجلية رائعة كروعة قلبك الحنون غاليتي، قربت المتلقي الكريم من خلالها الى صورة المرأة في الزمن القديم بمعاناتها و شقائها و جهلها لكثير من الأشياء
بخلاف المرأة في الزمن الحاضر، المرأة المتعلمة، المتقلدة لمناصب عديدة في كل الميادين، العصرية في تعاملها و سلوكها و تربيتها لأبنائها ووووو الخ
عن جد أستمتعت بما قدمتيه لنا أختي ليلى، شكرا لك من القلب
تحيتي لك

[ليلى مرجان]

أعتذر أ. فتيحة عن تأخير الرد
حضورك أثلج صدري و أضفى على نصي بهاء التعليق
فكوني دائما بالجوار