[محمد مومر]

سبحان الله..

سبحان الله
النَّاسْ بِكْلامْهَا دَرْجَاتْ
وكُلْ دَرْجَة لُومْ وعِتَابْ
مُوسْ حَافِي مَغْرُوسْ فِالذَّاتْ
بِالدَّمْ يَرْسَمْ لْوَاحُو فِسْحَابْ
يْهَرَّسْ ضْلُوعْ الشَّاقِي هُرْسَاتْ
نْدَامَة فْوَجْهُو يْسَدّْ الْبَابْ
العُنْوَانْ مَجْهُولْ حْرُوفُو نُقْطَاتْ
والْمَعْنَى تَايْهْ وتْقَرْقِيبْ النَّابْ
سبحان الله
النَّاسْ بِفْعَالْهَا حَارَتْ لَذْهَانْ
صْبَاحْهَا شْرِيدْ ومْسَاهَا عْنِيدْ
الْوَقْتْ مَحْسُوبْ فِكْفُوفْ الْمِيزَانْ
والْغَادِي فِطْرِيقُو مَا گَادّْ يزِيدْ
النَّفْسْ غَدَّارَة مَا فِيهَا أَمَانْ
ولَگْلُوبْ قَاسْحَة صْخَرْ وحْدِيدْ
الكَلْمَة الزِّينَة مَا عَنْدْهَا لْسَانْ
الْخَيْر هَزّْ رْحِيلُو لَبْعِيدْ
مْسَافَرْ بْلا ڤِيزَا قَاطَعْ الشُّطْآنْ
يْغَنِّي لَهْوَالْ لَحْنْ جْدِيدْ
سبحان الله
لَقْفَلْ صَدَّا والسَّارُوتْ غْرِيبْ
لَعْقَلْ سَارَحْ فِدْرُوبْ التَّفْكِيرْ
الْگَلْبْ يْنِينْ دَمُّو لْهِيبْ
ودْخَالْ بْنَادَمْ مَا عَنْدْهَا تَعْبِيرْ
سبحان الله
الْبَزُّولَة ذْبَالَتْ مَا فِيهَا حْلِيبْ
النَّفْسْ بَارْدَة مَا بْقَاتْ تْغِيرْ
الصّْبَاعْ مَبْصُومَة والْفِكْرْ يْشِيبْ
السُّؤَالْ مْعَلَّقْ وجْوَابُو فْبِيرْ
سبحان الله
حَمَّمْ نِيفَكْ وگُولْ أَنَا حَدَّادْ
ونَاسْ الْحَالْ طَالْبَة التُّوبَة
تْقَطْعَاتْ لَحْبَالْ والْخَيمَة بْلا وْتَادْ
والرَّزْقْ تَالَفْ فِگُفَّة مَثْقُوبَة
لَغْرِيبْ يْحَنّْ لْرِيحَةْ لَبْلادْ
وسَاعَةْ الْمَلْقَى بِالْهَمّْ مَحْسُوبَة
تْمَنِّيتْ تَفْرَحْ لَمِّيمَة بْلُولادْ
وتْفَيَّقْ لَحْلامْ فِوْجُوهْ مَحْبُوبَة
يْطِيبْ عْشَاهَا عْلَى حْطَبْ وعْوَادْ
تْفَرَّحْ لَصْغَارْ بْلَحْقُوقْ الْمَسْلُوبَة
تْغَطِّيهُمْ بِاسْمْ خَالَقْ لَعْبَادْ
ودَّفِيهُمْ بْحَنَانْ لَمِّيمَة الْمَغْلُوبَة

[ناجية عامر]

[align=center]
السلام عليكم و رحمة الله تعالى و بركاته.

كلمات رائعة جدا، ألفاظ و معاني واقع معاش، لهجة مغربية مفهومة. لا بد من رد الاعتبار لهده اللهجة التي تغنى بها كبار الفنانين المغاربة.
[align=center]
******
[/align]الدرجة المغربية لغتنا يا ناس
و ما ننسوهاش
يفهمها الشلح و العربي
يفهمها المتعلم و الأمي
و ما ننسوهاش

[/align]دمت بألف خير الأخ محمد مومر

[حسن الحاجبي]

الاخ الفاضل محمد مومر
تحية حارة و بعد...
الكلام رزين , و القول رصين , القوافي مشحرة تشحار,و المعاني مخفية بين لسطار,
لك مني كل آيات الإجلال و الإكبار
حسن الحاجبي

[عبد المعز ابو عيشة]

السلام عليكم ورحمة الله وبركاته


كلام جميل ولكن عذرا ؟؟؟؟؟؟؟؟؟؟؟؟؟؟؟؟؟؟؟؟؟؟؟؟ اين الترجمه