[محمد مومر]

كُونْ..

كُونْ عْطَاوْنِي..

نَعْطِيهُمْ غَلَّة

فْمَتْمُورَة رَاگْدَة

نْخَلِّي كْلامِي

مْعَانِيهْ فَايْدَة

كُونْ فَهْمُونِي..

نَكْتَبْ بِمْدَادْ عْرُوقِي

اشْعَارْ شَاهْدَة

نْصَفِّي حْلِيبْ

رْضِيعْ لَمْرَا الْوَالْدَة

كُونْ رَحْمُونِي..

نَرْفَعْ الرَّايَة

گُدَّامْ الْعَيْنْ الْحَاسْدَة

نَحْرَثْ بِكْفُوفِي

ونَزْرَعْ الأرْضْ الرَّاگْدَة

كُونْ سَمْعُونِي..

نْخَلِّي حْرُوفْ لِيتِيمْ

عَلْ السْطَرْ مْگَادَّة

نْغَرْبَلْ الصَّابَة

گَمْحْ وشْعِيرْ وَافْدَة

كُونْ قَدّْرُونِي..

نَدْفَنْ لَعْدَاوَة

ونْخَلِّي الْخَاوَة حَامْدَة

نَسْقِي الدَّالِيَة

ونْهَدّْ الجّْبَالْ الصَّامْدَة

كُونْ صَارْحُونِي..

نْشَگّْ لَبْحُورْ

وغْيُومْ السّْمَا لَمْشَادَّة

بْعَرْقِي نَطْفِي النَّارْ

ونْخَلِّيهَا خَامْدَة

كُونْ عَذْرُونِي..

نْكَحَّلْ عَيْنِي

بِكْحُلْ دَادَة حَادَّة

نَغْسَلْ الصُّوفْ

وغْزِيلْهَا لَشْتَاكْ الرَّاعْدَة

كُونْ اعْتَابْرُونِي..

بَقْلُمْ الطَّالَبْ

نَكْتَبْ لْوَاحْ زَاهْدَة

نَسْقِي بِعْسَلْ النَّحْلَة

لَگْلُوبْ الْبَارْدَة

كُونْ لاحُونِي..

نَرْكَعْ ونْصَلِّي

لَلْخَالَقْ دْرُوبُو وَاعْدَة

نَقْرَا قْرَانُو

ونْفَيَّقْ لَعْقُولْ الجَّامْدَة