ولدي لعزيز

[فتيحة الدرابي]

لعزيز , وليد

ولدي لعزيز

ولدي لعزيز
كنت أكبر فرحة
يوم جيتي للديا
اخديتك بين يديا
احمدت الله حيث بعثك ليا
كنت من عند الله أثمن اهديا
اخديتك ف حضني
واخترت ليك أحسن اسميا
عاهدت نفسي أمام الله نحميك
وانحطك ف عينيا
نكسيك، انسبطك، انقريك
أو نصرف اعليك على قد الرزق اللي ربي كتبو ليا
اسهرت معاك الليالي حتى شد عودك
وما بقيتي لحمة طرية
حافظت اعليك
أوواجهت كل ضربة قوية
اتحملت على ودك لكثير
وكل ما تحملتو كنت فرحانة بيك
وانت تكبر قدام عينيا
امشيت معاك خطوة خطوة
شديت بيديك واقطعت
بيك وامعاك اشواط ما كانت سهلة عليا
مرة نهزك، مرة انحطك، مرة انركبك فوق ظهري
قاومت الظروف وليام الصعاب اللي مرت بيا
اليوم آولدي الكورة بين يديك
الأبيض والأسود باين
وانت تختار
بغيتك تكون واقف وقفة السبع
تفرح بيك الخاطر
كيف تمنيت في الماضي والحاضر
وإلى ف يوم آولدي قسيت عليك
راني باغة غير نحميك
وإلى زيرت عليك
راني باغاك تكون راجل ماشي اشماتة
تهز بين اكتافك فاسك
تحفر على لحجر والدوب لحديد
تعيش بكرامتك
على الذل تكون بعيد
وإلى ف يوم آولدي
تقاضى جهدي
واكبرت ف لعمر
اوقف بجنبي ومعايا اصبر
كيف اصبرت معاك أنا ف الصغر
اعطيني من وقتك واعليا سول
اعمل معايا كيف اعملت امعاك
كنت نقضي ليك غرضك هو الأول
الباقي كلو يتأجل
ولدي نوصيك اوصية
إلى قلالت صحتي والتليت بين يديك
ما اتغوتش اعليا
عاملني بحنية
اعطيني من وقتك سويعات
شحال ما عشت ما ابق قد ما فات
غادة نودع ف يوم هاذ الحياة
وغادي تكتب فوق قبري
تاريخ اليوم والشهر والسنة اللي كانت فيها المماة
انوصيك آولدي وصية قبل ما نموت
الوالدين الواليدين قبل ما يفوت الفوت

شرح الكلمات
انحطك =أضعك
نهزك = أحملك
ودك = من أجلك
شد = القوة والصلابة
اشماتة= عيفة الرجال
تقاضى = ذهب
سول = إسأل
التليت = بقيت تحت رحمتك
تغوت = تصيح بصوت مرتفع

للمزيد من مواضيعي

 

[محمد الصالح الجزائري]

زجلية تعبّر عنا جميعا..شكرا لك زجّالتنا الرائعة..

[لطيفة الميموني]

كل التقدير والعرفان لك شاعرتنا فتيحة الدرابي ...أبدعت في إحراج ما في صدورنا نحو فلذات أكبادنا هداهم الله لما فيه خير لهم ولنا...دمت عزيزتي .
تحيتي وتقديري

[فتيحة الدرابي]

شكرا لك على المرور والمتابعة الدائمة شاعرنا القدير محمد الصالح الجزائري
تحيتي وتقديري.

[فتيحة الدرابي]

عزيتي لطفة، الله يلطف بنا وبفلدات أكبادنا
شكرا على مرور والمشاركة
تحياتي وتقديري.

[ليلى مرجان]

أختي فتيحة حفظ الله لك وحيدك المهدي
و أنعم عليك بصحة وعافية دائمتين
و أراك فيه كل خير إن شاء الله
محبتي

[فتيحة الدرابي]

شكرا لك أختي ليلى مرورك عبق الياسمين في فصل ربيعي جميل
تحياتي القلبية .