[محمد جادالله محمد]

فتفوتة..
الحكومة..لا تفكر..
ومجلس النواب..لا يفكر..
الكل اشترى..دماغه..
وعمل خواجة..
ولبس البرنيطة..
وساب اللى يعك..يعك..
واللى يلغوص..يلغوص..
وكل واحد..خدلوا..جنب..
بعيد..عن الزيطة..
والناس..اللى..جنب الحيطة..
لسة..قاعدة..جنب الحيطة..
شايلة..طاجن ستها..
وبتشد..في شعرها..
وبتسأل..من حرقة..دمها..
ليه بس..يا سادة..
تسيبوا الأمور..كده..
لحد ما توه..في الخلطبيطة..
طيب قولوا..
واحنا كنا..ح نتصرف..
كنا..عملنا..للمحروس..تعويزة..
ولا حفلة زار..وتحويطة..
بدل ما تخدوه..على مشمه..
وتنزلوه..يعوم..
وهو ما بيعرفش العوم..
ويدوب منكم ..
وما يتفضلش منه..حتحوتة..
بقى ده إسمه..كلام..
الجنيه الطويل..العريض..
اللى..زى..البشكير..
أو..على.الأقل..زى..الفوطة..
ما يجبش دلوقت..بسلامته..
ولو..حتة..فتفوتة..
حنقول..أيه..
غير..الله يرحمه..
إتحسد..يا عين أمه..عليه..
جاته..الفرة..
وأخدته..الشوطة..
كلماتي وبقلمي..
محمد جادالله محمد الفحل