[عزة عامر]

ما تغصبوش عل القمر يبكي ،
مدام مخلوق عشان يضحك
في ليل الحزن وينور ، عيون الليل بتتخبى
فى ظل عيونو وتداري ، ومتداري ف خيال الناس
وأنا اللي بحزنهم داري ..
وبسمع صوتي من كلمة ف شفايفهم ،
ساعات حرفي أنين بيبات ف ليل تعبان ،
وصبح نهار طلعلو نجوم مخوفهم
وحرف لقلب كان مكسوف لكن عشمان
وصوت أنسان جمع الأحباب وصنفهم
ومش هما اللي أنا عارفهم ، ما تسألنيش !!
يا وردة شوق في كوبايتي هتحتاري ..
متسألنيش عن المكتوب وانا مش فاهمة أفكاري
ما أنا نفسي سؤال نفسي بيسأل بردو أسراري
ولا تجاوب سؤالي الصعب ،
تعب يمشي بطول الدرب
رجع تاني يلف يدور ما بين عقلي وبرمجته
يشوف تفسير لإصداري
وليه الليل هناك قاعد في دار افكارو مش داري ؟!
متسألينيش عن المكتوب !!
يا حرف وفات عليه أوقات بأسفاري
يادفتر أصفر بدون فيك ذبول وردي ،
وحلمي الذهبي والفضي
وعود ملفوف بأزهاري
وعود مشدود جمال معهود
لمحتو دموع على خضاري
وورد خريف شجر وحفيف
بدون كل شيء عنو بدون تزيف ،
وببني في قصر أحلامي ،
وسور ذكرى لأنس الجاي ف أيامي
ومهما افصل ما بين جدران كانت بينا
واعزل بالحروف لمكان ، لأي مكان بيبعدنا
بلاقي إنو مقربنا وهو هناك ساكن جاري
قمر ف مرايا فرد جوايا ذراع من نور
سما وبحور همس بعنيه قومي اختاري
وبسمع في الكلام همسو واحس بقشعرة لمسو
كأنو حد جوايا بيحكي نبض إحساسو
فينقل كل أخباري
كأن حروفي من نفسو وبعمل نفسي آل عادي
ولا مني ولا منو ولا طيني تشرف مرة ببلادو
ولا طينتو اللي كان منها ترابها ذرة في بلادي
لكن داري بطيبتي عنادي فحذاري يكون جنبي
وأنا سرحان ..
ما حجبتنيش طول المسافات ، هوا الفرغات
عن الأوقات وسيرو ف شارع اللمة ،
وضي ف عينو كام غمة
عن العسرة وساعة ف ايدو مكسورة ،
ورجلو في جبس مجبورة ،
ودمعة في حارة الهجرة،
عن العشرة وكام ف دماغو من فكرة
وإيد ممدودة بالخمرة ومية غمرة
وريشة بترسم السمرة ف هوا الأيام
عن العامية والفصحى وعمايلهم
هنا أغنية نعسانة هناك يصحى
مفيش حصة بيحضرها
حياة ف إيديه جرس فسحة
بطول العمر ما ضربش ،
ولا بيقعد على الدكة
وغاوي يبعثر السكة وخطاواتو
وكام ذكرى ، في حلم الليل بينشرهم
يخيط قصة مقطوعة وحاطط جنبو
كام إبرة ، وخيط مربوط في طيارة
ورق في الجو محتارة يوجهها بصوت
مبحوح بصفارة وترجعلو كطير عطشان
لكام كلمة ، عشان يكتب
على جنحها بقية نسيها في القصة ..
وكام شجرة حنين زارها ،
وساقية شوق مدورها
وشارب كل ميتها
ويتألم على اعتاب الندم جارها
يلملم ورد أحلامو يصمم زي أشجارو
ويصنع من خريف الحلم شبكة ومهر
مهو مصمم بأزياء الزمان والدهر
وزهر وشوكو متنقي بنزف وقهر
يزين خد أحلامو بدمع النهر
ويحكيلي عن الخاينين وطعن الضهر
عن السارقين سنين عمرو في عز الظهر
عن اللي ف قلبو متداري ،
هتحجبني وأنا ف قربو في ليل سهران ؟!
واعيد وازيد في انكاري وامثل إن أنا سكران ،
وبعمل نفسي مش عارف
تفاصيلو اللي أنا حافظها ولو لابس
جلود الناس وأدام عيني مش عاري ،
لكن عاري وانا بكل اللي فيه داري ..
متغصبوهوش على الدمعة ،
ولو نورو يقيد شمعة ، سيبوه يفرح
ولو كان حتى بيواري ..
متسألنيش عن المكتوب كلام في غيوب
وضلمة ونور ، حروف بتدور
ودنيا تايهة جوايا ومش عايز ألاقيها
مجرد بس بحكيها ..

[ليلى مرجان]

حرف زجلي مرسوم بحبر العين، رائق بديع مشبع بجمالية اللفظ العامي، والصور العميقة المتنوعة الدلالة؛ تشجعل المتذوق للتراث الشعبي في هذا الباب الفني الزجلي يعيد قراءة النص أكثر من مرة ليرتوي بجمال القول المعلن والمضمر وراء الحرف.
شكرا لك عزة على الإمتاع، لا حرمنا الله من هذا الفيض المدهش.
محبتي ملء القلب

[عزة عامر]

اقتباس  عفوا ,,, لايمكنك مشاهده الروابط لانك غير مسجل لدينا [ للتسجيل اضغط هنا ] المشاركة الأصلية كتبت بواسطة ليلى مرجان حرف زجلي مرسوم بحبر العين، رائق بديع مشبع بجمالية اللفظ العامي، والصور العميقة المتنوعة الدلالة؛ تشجعل المتذوق للتراث الشعبي في هذا الباب الفني الزجلي يعيد قراءة النص أكثر من مرة ليرتوي بجمال القول المعلن والمضمر وراء الحرف. شكرا لك عزة على الإمتاع، لا حرمنا الله من هذا الفيض المدهش. محبتي ملء القلب

طبعا سعيدة بتواجدك ليلى جدا ، وبكل ما كتبت تعليقا على الزجلية ، شرف لي أن تعطي زجالة مثلك ، رغم اختلاف اللهجات بزجليني .. شكرا لك كثيرا بمرور أسعدني ، وطلة حرف أبهجني مع خالص التقدير ، والمودة .

[خولة السعيد]

اللي مكتوب علجبين لازم تشوفو العين...
مش حسألك يا ستي( ابتسامة)

[عزة عامر]

اقتباس  عفوا ,,, لايمكنك مشاهده الروابط لانك غير مسجل لدينا [ للتسجيل اضغط هنا ] المشاركة الأصلية كتبت بواسطة خولة السعيد اللي مكتوب علجبين لازم تشوفو العين... مش حسألك يا ستي( ابتسامة)

ههههه لا مش لازم أبدا ، ممكن نغمض عنينا أصلا ، ولو سألتني كيف أجاوب عن اللي معرفوش ؟! والله ولا أعرف من وين بيودي لفين؟؟! 🤔😅