[محمد أبو زيد الأسيوطي]

علامةأستفهام؟؟
للشاعر / محمد أبو زيد الأسيوطي
لساك مستني
وبتغني؟؟
غنوة عن العدل
وبتحلم بالفجر
يبان
وظلام الجهل
يرحل بلا عودة
لساك واقف
علي باب الوحدة
بتنادي النور
تحلم بالسور
اللي أتهد
علي راس الليل
تحلم بالسيل
اللي يغير
مجري التخاريف
اللي في روسنا
تحلم بجبال
م الحرية
تعملك سد
تحميك من ظلم الأباليس
وطغاة الغد
لساك ماسك
سيفك معكوس
مكسور السن
بتحارب هكسوس
ومأجوس
وقريش يوم بدر
وصلاح الدين
قبل التطبيع من يوم حطين
قرر هيبيع
مش بيرد
لو كان تفكيرك ملبوس
مش زمن الجن
ومفيش ف العش المهجور
الا الغربان
ظهرك مكشوف
وفي لا حصان
ولا طاقة نور
مليون خاين يطلع ويدوس
علي ردم إحساسك
من ساسك
من شعرك من راسك
من قلب ضوافرك
جواك
مليون منجوس
ولباس الخوف
اللي معشش
في سماك معروف
لسه بتتظاهر
بالقوة
وبتلعب دور الانسان
خربان من جوة
وبتخالف
كلك تالف
متحالف بعضك
مع ضدك
انه يهدك
ويعدك
ضمن الأشباح
منتش سباح
بتقاوم ضد الأمواج
من غير مجداف
والريح مجنون
هيحشك من طولك
ويطولك
لو فين ما تكون
لو بطن أمك حن
وشالك
راح يقطع ع السكة
خيالك
ومجالك
خط ومحدود
للتوهة تعود
والخطوة
في دربك مشبوهه
رهنونها
لخارج بلدانك
وميدانك
قلبوه للرقص
هجص وتهليب
فاهم يا لبيب
ولا دماغك متباعة كمان
مش فاضل
غير بعض حناجر
وبواقي لسان
وكمان مربوط
تشبة للتور
في سواقي الاوهام
بتدور
لابس طرطور
وبتنطط
جوه مخطط
مرسوم بالضبط
فاهم
ولا انت بتسعبط
واقف ع الخط
لو قرصك تعبان
في ودانك
هتقول حرمت
قدامك موتك
ودمارك
شدك للخلف
وبتجري في صف الاموات
وسحابة فقر
متبعاك
مولود للقهر
ومتعاقد
مع مليون عام
دي سياسة
وسيستم لنظامك
قدامك
قفصك اترافع
او دافع
عن نفسك
حاول واتقدم
خطوة لقدام
حكم الإعدام والسجان
مستني رقبتك
والتهمة ثابتة ولبساك
بدور جواك
علي بذرة
تطرح بالخير
وده مش مسموح
ممسوح التفكير
ومصيرك دايما مجهول
وبواقي الروح
لو حاولت تطلع يوم منك
راح يطلع غول
ويدمر أجمل طموحاتك
ويزود كوم إتهماتك
خاين وعميل
دايما تتامر ع السلطة
والغلطة
بفورة المرادي
بتعادي في مين
بحر من الطين
بتشله
وذل موطيلة
ووصلت الأرض
ولساك
من جوة الكهف المهجور
بتنادي سماك
تبعت لك نجماية تنور
بركة دنياك
وبتضرب
كفك علي كف
مستني الفيل
لما يعدي
من خرم الابرة
الفكرة
قديمة مصدية
والحرية
كلبها سعران
لساك بتقرفص
سهران
بتعد رمال الصحره
تهرتهل بكلام الجاهل
والقمر المخنوق
بيراقبك
بيطمن قلبك
مش راحل
ونهارك
مش جاي بالساهل
لساك فاهم أنك مظلوم
اشرب لكعانك
من ويلك
خليك موهوم
نيلك مش ليك
اياك تتحرر
من سجنك
وأي قيود
معهود
انك تفضل ميت
وتنادي الموت
وتلف تلف
وتعود
علي نفس النقطة
اللي اترسمت
من مليون عام
تتكعبل
مش عارف توصل
ابدا لشطوط
صوتك مكبوت
وبتعجب
من هذا الحال
وحياتك
ميت ألف
علامة للاستفهام
؟؟؟؟؟؟
رابط للقصيدة علي اليوت يوب
http://www.youtube.com/watch?v=EyFNmoNMzTY

[دينا الطويل]

الاستاذ محمد الاسيوطي .
اليوتيوب يتضمن مشاهد مؤلمه تماما كوقع كلماتك واحرفك التي تعري وتفضح الزيف

تحياتي لقلمك

[محمد أبو زيد الأسيوطي]

شكرا لك اخت دنيا لمرورك بقصيدتي القصيدة والصور ما هي الا جزء من الواقع الاكثر ايلاما

[عادل سلطاني]

السلام عليكم ورحمة الله تعالى وبركاته
أخي الشاعر الفاضل المبدع أيها الصعيدي الشامخ يابن أعالي النيل إن هذه الرائعة الزجلية تنقلنا إلى عوالم مرمزة تعكس الواقع المر المنبطح الذي نعيشه وسادتنا وكبراؤنا يقدمون فروض الطاعة والولاء لغاصب "الأرض القضية" ذلك الدموي الملعون على مر التاريخ..... فهنا ومن خلال هذا الحدث الإبداعي الذي سجله ذات صدق شاعر حر مبدع لايستطيع إلا أن يكون" محمد أبوزيد الأسيوطي" وهنا مرة أخرى ومن خلال هذه الفلذة تتلاقى رموزنا الثائرة في الزمان والمكان عسى تنهض الأمة من سباتها وتعود لأسباب العزة.....دمت أيها الفاضل مبدعا متألقا صانعا للحدث الإبداعي المحتذى
تقبل أيها الكريم تحيات أخيك عادل سلطاني

[نعيم الأسيوطي]

شاعر العامية ومحامي المظلومين / محمد أبوزيد
استمتعت بقصيدتك هنا وهناك وترف انطباعي عنها .. لذا لا نحتاج إلى علامة استفهام واحده بل لكل مواطن عربي يحتاج إلى هذا الأستفهام لكي ينهض من نومه العميق ..
مودتي وتقديري

[ناجية عامر]

زجلية رائعة رغم ما تحمله من ألم و حزن
نتمنى النصر لاخواننا في غز و في كل بقاع العالم
أسلم الله يراعك أخي الشاعر محمد أبو زيد الأسيوطي

تحيتي و تقديري

[منى عبد الحافظ]

الشاعر الكريم /محمد أبوزيد
تحية لنبض قلمك وإحساسك بعروبتنا وإنسانيتنا
التى تاهت ولانعرف لها طريقا للوصول
ابكتنى قصيدتك