[محمد أبو زيد الأسيوطي]

أحلي حدوته

// للشاعر // محمد أبو زيد الأسيوطي

و فاكرة زمان

علي التوتة

رسمنا قلب سهم ودار

وشمس نهار

وبنوتة

بيغسل توبها ضي

الشمس

وبتغني بلغة

الهمس

وبتحكي لبكرة

وأمس

لينا وبس

حدوتة

كانت حلوة

وقمورة

واحلي من أي بنوتة

وبتغني بأجمل لحن

في الجنة

وتطلع زي قمر الليل

علي ليالها

ونيلها

كان بيفتنا

جمال يشبه تقاسيمها

وتقاسيمنا

وصوت يشدو

كما المواويل

وشمس أصيل

علي الضفة

وع الشفة

كلام يسحر نجوم الليل

وورد وزهر عنابي

شفايفها

ولما لمحت

مخاوفها

قفلت عليا محرابي

ورحت أصلي صلواتي

وأدعيلها

يا رب أقبل دعاواتي

مليش غيرها

مليش غير حضنها

سريري

وتفكيري أتقسم نصين

في ناس

بتحب ليه واحدة

وناس بتحب بالملايين

وناس معدومة

م الإحساس

وناس بتغني في الزفة

ومش شايفة

ولا عارفة تغني لمين

وأنا مقسوم لي

أحب أتنين

بحبك أنت يا أمي

وأم عيالي

والبنتين

منار

الأولي سنة أولي

غرام فيكي

يا أم الدنيا

والتانية دي

مي

شقاوة العاشقين

خسارة

يا قلبي مش شايل

يا ريت

عندي كمان قلبين

لأني بجد مش طايل

اسيب حته

من الإحساس

أوزعها علي الباقيين

خلاص

قلبي أتملي بالحب

وبحر حنين

في شراييني ليلاتي يصب

ومش عارف أوديه فين

يا ربي صونها

وأحرصها

دي حساني وأنا حاسسها

يا قمره بتسبل القصة

علي أجمل واحلي جبين

بيلسمها

دي أنفاسها

عبير ونسيم دي

سنيورة ومحفروة

في جدران قلبي

ع الجنبين

بنينا طوبة فوق طوبة

علي ترابها

وكبر الحب

أسطورة

في محرابها

ومكتوبة أسامينا

علي سحابها

علي جريد النخيل

ع الظل

علي نسمة عبير

بتهل

علي نجمة وقمر

بيطل

علي الضحكة بوادينا

علي الخضره

ع الصحرا

اللي بتنادي الربيع

فينا

علي الماضي علي بكرة

اللي مستني

بلهفة لأجل ما يجينا

علي كل اللي صار

ذكري

علي سحاب الأمل

والحلم

يا أجمل غنوة جوه الدم

كتبت في العيون

السمر

نشيد للحب يتغني

مع العصافير علي الأزهار

قصيدة عشق م الجنة

تغير منها جميع الأشعار

وتتمني

تبوس خدك

وتعبد نظرة ف عنيكي

وحواليكي

نطير نرقص ع الأغصان

بأحلامنا

وأنا فرحان وبتهني

في قلبي

لسه تاني كلام

وشوق وحنان وألف غرام

وزغروته

بحبك

لو هموت فيكي

متين موته

يا مصر

يا احلي حدوتة

[حسن الحاجبي]

يا أسيوطي يا أبو زيد
لما عرفتك , صار يومي عيد
زدني من شعرك زيد
متعني طرب و تغريد
سلم لي عا المحروسة
وحط على خدها بوسة
قول لها إنو أنا بهواها
زي ما انت ذايب في هواها


مع خالص التحية والتقدير
حسن الحاجبي

[د. ناصر شافعي]

رائع ..
رائع ..
رائع ..
رائع ..
رائع .. كلمات بسيطة صادقة .. صادرة من قلب صافي و عقل واعي محب عاشق .
تحياتي و تقديري العميق لكلماتك الحلوة .. ومشاعرك الأحلي .. ولا أجد كلمة أقولها أغلى .. من كلمة الله.
د . ناصر شافعي

[محمد أبو زيد الأسيوطي]

اقتباس  عفوا ,,, لايمكنك مشاهده الروابط لانك غير مسجل لدينا [ للتسجيل اضغط هنا ] المشاركة الأصلية كتبت بواسطة حسن الحاجبي يا أسيوطي يا أبو زيد لما عرفتك , صار يومي عيد زدني من شعرك زيد متعني طرب و تغريد سلم لي عا المحروسة وحط على خدها بوسة قول لها إنو أنا بهواها زي ما انت ذايب في هواها مع خالص التحية والتقدير حسن الحاجبي

استاذي الكريم يتغني باسمي ده شرف ليا
اشكرك علي تلك المشاعر النبيلة
وردك الجميل

[نصيرة تختوخ]

جميلة جدا وعذبة قصيدتك دام إبداعك و أتمنى لإشراقة قصائدك أن لاتغيب عن المنتدى.
دمت بكل الخير أستاذ أبوزيد و حفظ الله مصر .

[نعيم الأسيوطي]

شاعر العامية ومحامي المظلومين / محمد ابوزيد الاسيوطي

تحية حب وتقدير

مازلت اتابع معك احلى حدوته وانتظر منك المزيد من جمال شعرك العامي

مودتي وتقديري

[طارق شهاب الدين]

الله عليك يأستاذ/ محمد
أمتعتنا بكلماتك الرقيقة الرقراقة كما صفحة النيل
تحياتي وتقديري لهذا الجمال الرائع
والبساطة التي تقودنا لعالم من التخيل الجميل
والإحساس النبيل ... أمتعك الله كما أمتعتنا بشعرك

[طارق شهاب الدين]

الله عليك يأستاذ/ محمد
أمتعتنا بكلماتك الرقيقة الرقراقة كما صفحة النيل
تحياتي وتقديري لهذا الجمال الرائع
والبساطة التي تقودنا لعالم من التخيل الجميل
والإحساس النبيل ... أمتعك الله كما أمتعتنا بشعرك