[مسعدالنحلة]

شارع الحياه

يا شــــــارع الحياه ... ماشيين من غير دليل

بندوَّر ع النجـــــــاه ... في نهرك الطويــــل

لكن في كل خطوه ... بنلاقي المستحيــــــل

واقف في إيدُه فاسُه ... بيكسَّر في الأمــــــل

ـــــــــــــــــــ

تعابين فـــي كل حته ... وحرابي ملوِّنـــــه

وديابه ف كل ناصيه ... بْأنياب مِتسنـِّنـــــه

وتعالب تِتستخبَّــــــى ... علشان تطلعلنــــا

تخطف منينا قوُتنا ... وتصيبنا بالشـــــــلل

ـــــــــــــــــــ

وكل ما نمشي نلقــى ... دايمًا واقف جـِدار

عالي سادد طريقنــا ... ومعطـَّل المســــار

ونهدُه يهِد حيلنــــــا ... ونلاقي بعدُه نــــار

نقف ساكتين حيارى ... عاوزين نلقالها حل

ــــــــــــــــ

نستنـَّى لما تِهـْدَى ... وتسيب حبة رمـــــاد

والوقت يكون سرقنا ... وفات منـَّا المعـــاد

والتاني يكون سبقنا ... وطلع ع القمه ســاد

بعد ما جهـِّز مكانـُه ... واتمطـَّع وانعـــــدل

ــــــــــــــــــ

الجوع ياكل بطوننا ... وهُمَّـــا شبعانيــــــــن

والفقر يقوم يشيلنا ... فوق سكاكين مسنونين

يشجي فيهُم ألمنــا ... بصوت مليان أنيـــــن

وجراحنا اللي ف قلوبنا ... دايمًا ما بتندَمَــل

ـــــــــــــــــــ

تـُهنا ف وسط الطريق ... بعد ما غاب النهار

لا شموع بتعوز تقيد ... ولا فيه نور ف المنار

ونلِف ف حِته ضلمـه ... حوالين نفس المَـدار

نتعب وننام مكاننـــا ... بعد ما صابنا المـــلل

ــــــــــــــــــ

يا ريت نفوق ونِصْحَى ... نمسك مرزبَّه نِكـْسَر

الحيط اللي ف طريقنا ... علشان مسارنا يظهر

والليل يهْرب ويخفـَىَ ... وقلوبنا تقيد تنــــــوَّر

نمشي نحقق أملنـــا ... بخطاوي بـــدون كسل

ــــــــــــــــــ

نوصل قـــــــوام هناك ... عند نهايــة الطريق

نرفع رايــــــة الحيــاه ... عاليه ونكـُون فريق

منسيبش حــــــــد فينا ... وحدُه زي الغريـــق

لازم نبقى بصمودنــا ... ثابتين زي الجبــــل

**********

[نصيرة تختوخ]

قصيدة تعبر عن واقع المواطن في مجتمعات تغيب عنها العدالة و المساواة ولازل مشوارها نحو تحقيق الأفضل يتطلب تضحيات و نزاهة.
تقديري لك أخ مسعد