أنــا آســـف/////د.أحمد فرحات

د.أحمد فرحات · 06 / 07 / 2010, 15 : 02 AM

أنا آسف
وسامحيني أنا الغلطان
أنا راجع وكل دموعي سبقاني
وبصرخلك أنا ندمان
ومش عيب إني أشكيلك
وأحكيلك
على اللي جرالي في بعادك
أنا والله من غيرك
بموت في الليلة ميت مرة
ومش ناسي
بإنك كنتي واعداني
نعيش عالحلوة والمرة
وأنا اللي جنيت وبالمرة
هربت وقولت مش راجع
خدتني الدنيا بغرورها
ولما كنتي بتنادي
عملت كأني مش سامع
وكملت الطريق وحدي
لقيتني فـ وحدتي ضايع
أنا آسف
وبتمناكي تفتكري ليالي زمان
وأيام الهوى المرسوم على جبينّا
وضحكة قلب نَسَّتني هموم الدنيا والأحزان
وأحلامنا الصغيوره
ببيت يجمع براءتنا
نجيب طفلين يخلونا
طيور فرحانة عالأغصان
حبيبتي...لسه فاكراني؟
وفاكرة لما قولتيلي
بحبك إنت مش ممكن يكون قلبي
أسير غيرك دا مهما كان؟؟

أنا جيتلِك
وعارف إني أستاهل
أدوق المر من ظلمي
وانول حرمان
ولكني بشوق جايلك
وف إديا الفؤاد قُربان
ومش طمعان انول منك
سوى الرحمه
واعيش الباقي من عمري
أسير أمرك
أنا أملي
مهونش ف يوم على قلبك
ولا تتمسِّكي ف غلطه
وتتبدِّل .....
مشاعر ساكنه جواكي
وقلبي النازف الشاكي
تجازيه نكران
حرام اجري في براح قلبك كما الشريان
حرام احيا في نيل حبك
واعيش لاجلك
واموت عطشان

رشيد الميموني · 06 / 07 / 2010, 27 : 02 AM

كلمات مفعمة حبا .. تغلب عليها مسحة الندم لتنتهي بطلب الصفح عما مضى ..
استمتعت أخي الغالي د. أحمد بهذه الكلمات الرقيقة وتخيلتها ملحنة ومغناة من أشهر الفنانين ..
شكرا لك ..
تقبل مودتي .

د.أحمد فرحات · 07 / 07 / 2010, 38 : 04 PM

الأديب الغالي

رشيد الميموني

أسعدتني حد السماء بحضورك الجميل أيها الرائع

فكن دائما بالجوار

شكرا بطول النيل