[فتيحة الدرابي]

بنتي يا بنتي لحبيبة
شحال طولتي الغيبة
اتوحشتك بزاف
والكبدة اصعيبة
بغيت انظمك
ونطفي نار شوقي الرهيبة
انكحل عيني بشوفتك
وتكوني احدايا اقريبة
غيبتي غيبة
غيبة قاهرة يا لحبيبة
رجعي يا لغريبة
الشمس اتغيب والطل
وانت لا أثر ليك ولا ظل
الهلال إيغيب ويبان مرة في الشهر
وانت غيبت غياب الدهر
يابنتي طاوعتك والندمتيني
لو نرجع لليوم فيه امشيتي
ما نخليك اتخطاي عتبة بيتي
اقطعتي لبحور
غبرت غبور
اتسنيت ايام وشهور
يمكن إطل النور
كان وهم واصبحت بيه مسحور
شكون إيكول اشكون
أني ما غ نبقى نسمع اسمك إلا في التلفون
اقصاحيت وقلبك اصبح مرهون
وديار الغربة ما بقات عليك اتهون
ولات عندك هي لمكان المأمون
وعليها كلشي يتلغى
ولو إيكون اللي إيكون
نسيت الحضن الدافي
اسباب وجودك في هاذ الكون
نسيت الكنز المكنون
اللي في بلادك مدفون
نسيت ونسيت
ضعتي و ضيعت
ضعت وسط لغراب
وضيعتي احوايج
ما تحسي بيها إلا وسط لحاب
أش نكوليك آلحبيبة
الله إيرد بيك
ترجعي ونشوفك اشويفة
تهمد نار كبدتي الرهيفة
لا تخليني وسط الناس ضعيفة
إيسولوني اعليك
نشوف في عينيهم نظرة اسخيفة.
فتيحة الدرابي

[حسن الحاجبي]

الشاعرة المبدعة : فتيحة الدرابي

مازال طيرك يرجع للوكار
ومازال تكحلي بشوفتو لبصار
مازال الفرحة تعم الدار
ترجع الغايبة
وتفوت ساعة لغيار


زجلية معبرة وموضوع راقي
دمت سيدتي ودام لك التألق في نور الأدب

[فتيحة الدرابي]

شكرا لك أيها الأستاذ الموهوب : الحاجبي حسن على أبيتك الزجلية الراقية .
أبقاك الله مشجعا ومساندا لهذا النوع من الشعر حتى يصل إلى مرتبته التي يستحقها.
في رعاية الله.