[فتيحة الدرابي]

يا مالك الروح
والقلب والوجدان
واش عاقل على اللي كان بينا
ولا اخداك النسيان
ولا طويت صفحة ازمان
وكل ما اجمعنا من حنان
إلى كنت إنسان
سول فيا مهما كان
شحال انت صعيب وقادر اتعذبني
كيفاش من شوفت
عيونك تحرمني
بالله عليك قول لي
آشن ذنبي
ياك أنا اللي اوهبتك قلبي
غيبتي وزاد بعادك وجفاك
خليتي الروح والبال مشطون معاك
متأكدة أنا
بللي ما نقدر ننساك
وبلي ما تقدر تمنع
قلبي باش إيفكر ف هواك
فكر فيا عفاك
وما تهون عليك الدكريات
لا تقول لي اللي كان بينا
اتغير أو فات
حبك هازاه
بين اضلوعي حتى المماة
وصورتك ف عيوني
احسن ما شافت و رات
ولا صوتك ملي انسمعه تتغير ف قلبي الدقات
ريح قلبي وقو لي
واش نقدر نشوفك
ف كل الأحوال
ولا هذا من المحال.

[زين العابدين إبراهيم]

ريح قلبي وقو لي
واش نقدر نشوفك
ف كل الأحوال
ولا هذا من المحال.

ما يدوم حال يا مجدوب الغيوان.......



روحناك يا لعريس لمك حادة

بنت ولاد شبوخ ماما ...

يا حباب الغيوان....

من عندو محبوبو عازو ...

وأنت محبوبك جفاك.....

كل شيء غادي والدايم مولانا

ما يدوم حال

جميل ما خطت يداك لك كامل الود والتقدير يا أميرة الزجل

[ناجية عامر]

قلب مهموم، متعطش لدكريات مضت، كان الله في عون الجميع

كلمات اكتبها مباشرة أتمنى اختي أستادة فتيحة ان تقبليها مني كاضافة لحروفك الصارخة

سولوني عليك آحبابي
علاش خويت الدار
حلفت أنا ما نبوح بلسرار
واخا هجرتيني بلا سبة
ألفت شحال من كدبة
حيث كنبغيك
و ما ناوياش نفرط فيك
في كل لحظة نسول نجوم الليل
بدموع على لخدود تسيل
طل علي عفاك
داوي قلبي العليل
أنا رميت بآشواقي عليك
نتمنى ربي يهديك
ترجع لبيتك
و ما تلقى غير ليرضيك

تحيتي و تقديري

[فتيحة الدرابي]

شاكرة لك مرورك البهي يا أستاذ زين العابدين ابراهيم ومشكورعلى ما خطته أناملك من أبيات جميلة ومعبرة، ممتنة لك لأنك لقبتني بأميرة الزجل ترى هل أستحق هذا اللقب؟ أسعدني مرورك كثيرا لك كل الود والتقدير تحياتي.

[فتيحة الدرابي]

أستاذتي الغالية ناجية عامر: طلتك تبهجني وحرفك يشدني هذا الحوار الزجلي الذي دار بيني وبينك اليوم وبيني وبين الأخ زين العابدين أسعدني سعادة لا تقدر بثمن ، هذا هو الاستمتاع الحقيقي لكما تقديري واحترامي.