[مرمر يوسف]

اللى صاحب عقل يسمع دى النصيحة قبل ما يدوق العذاب ويدور لى حاير.

واللى خايف من المشاكل والفضيحة لم يخلى تحت سقفة جوز ضراير .

يبقى بينهم ملطشة ويعيش مكدر أو أسير للحلوة فيهم طول حياتة .

واللى وحشة تتهجر " دا شىء يحسر " دى مراته فى الحقيقة ودى مراته .

واللى بتخلف بنات يكرهها خالص واللى بتخلف ولاد تتحب ليه .

فى الحقيقة لسه مافهمتش ولايص بدى أفهم هى بس بايدها ايه .

لو خرج فى الصبح وابتسم لواحدة تتمرع وتدوق التانية العذاب .

والمضاربة تشتغل بعد المناهدة كل دة من بعد يوم كتب الكتاب.

الجيران تسمع زعيقهم والشتيمة والمناكفة والمناقرة والعياط .

يبقى راجل فى البلد مالهش قيمة كل ست اشهر نكد يوم انبساط .

يكسروا الأطباق ودى تتهم فى ديه أو يحطوا لبعض شطة فى الطبيخ

كل واحدة طالبة للتانية الأذية يكتبوا له السحر فوق جلد الفسيخ .

والمصيبة لو يكون راجل فقير كل واحدة فى السنة تولد له عيل .

لو يجيب فى الجمعة أردبين شعير ع العيال دول كلهم برضك قليل

يلبس البالطو مهربد والفانلة يعمل الأكمام بتوعها جوز شراب .

كل دة شغل الضراير والأدلة ظاهرة ان الضرتين أصل الخراب .

لما تكتر له العيال واديه تقصر يكرهوه لتنين وتتنكد حياته .

يبقى ماشى حالته فى الحرمان تحسر واللى كانت عال تكفر سيئاته

يشتكوه لتنين وتتنغص حياته ينحبس لو ما يدفعش الفلوس .

فى الشوارع تلقى أولاده وبناته فى المحاكم تلتقيه داير يحوس .

كل واحدة تعلم أولادها الشقاوة يضربوا التانين وجوز لتنين يناهد .

تنزرع م الصغر أسباب العداوة يطلعوا أعداء وأصل الأب واحد .

القديمة لو تكون حلوة وجميلة ليه بيتجوز عليها ضره تانية .

والجديدة لو تكون وحشة ورذيلة ليه ياخدها ما تقولوله الدنيا فانيه

الضراير هم دول أصل المشاكل والشكل لابد يرسى على الطلاق .

اللى ياخد ضرتين لازم يعامل كل واحدة بالمحبة والوفاق .

والكلام دا لو يكون صاحب كفاية انه يصرف صرف عال عا الضرتين .

افتكر المعنى دا وارد فى ايه للى له ودنين فى راسه وله عنين .

اللى صاحب عقل يسمع دى النصيحة قبل مايدوق العذاب ويدور لى حاير.

واللى خايف م المشاكل والفضيحة لم يخلى تحت سقفه جوز ضراير

[نصيرة تختوخ]

قصيدة معبرة وترسم صورة تثير الشفقة لجوز الضراير..

[مرمر يوسف]

اخت نصيرة شكرا لك على اهتمامك ب مشاركاتى ارجو ان تحوز إعجابك طبعا انا كتبتها من فترة طويلة

ولكن نظرا لإزدحام المنتدى وكل ثانية مشاركة جديدة فتختفى المشاركات .اشكرك شفتى اللى متجوز اثنين جراله

ايه . على فكرة فى واحد كان متجوز اربعة وكانو عايشين مع بعض دى حقيقة وكان بطل العالم فى رفع الاثقال

وسلم على هتلر بعد فوزه اسمه ابراهيم شمس من الاسكندرية .

[حسن الحاجبي]

الله ينور عليك يا مرمر
كلامك عسل وأشعارك عنبر
مستنيين منك أكتر

[ناجية عامر]

[align=center]
مساء النور الأستاذة مرمر

مثال مغربي بالمحكية يقول :

الثور مول 2 رقابي كيجيف : يعني الرجل المتزوج امرأتين يختنق، أما الرجل المتزوج أربعة، يموت من شدة الضغط .

شكرا لك أستاذة، ننتظر منك المزيد من الأقوال و الحكم

دمت بكل الود
[/align]

[مرمر يوسف]

الاستاذ الفاضل / حسن

شكرا لمروركم الكريم على فكرة زمان كنت بحب القراءة جدا وكنت دايما أحتفظ بأى شىء يعجبنى من هذه القراءات

وهذا الزجل موجود عندى من أكثر من عشرين عاما .

[مرمر يوسف]

الأخت العزيزة ناجية / بعد التحية

اشكرك على التواصل معى عايزة اقول لك ان زمان كان الرجل يستطيع الن يتزوج اكثر من واحدة

لكن إطمنوا فى هذه الأيام الرجل مش قادر يجوز واحدة بسبب نار الاسعار .

تحياتى